راولپنڈی اور اسلام آباد میں تیز بارش، تمام اداروں کو ہائی الرٹ رہنے کی ہدایت

راولپنڈی اور اسلام آباد میں تیز بارش کے باعث تمام اداروں کو ہائی الرٹ رہنے کی ہدایت کردی گئی۔

سیدپور میں 43،گولڑہ 5 ، پی ایم ڈی میں 43 ، نیوکٹاریاں12، پیرودھائی 4 اور شمس آباد میں 2 ملی میٹر بارش ریکارڈ کی گئی۔

ڈپٹی کمشنر راولپنڈی نے تمام اداروں کو ہائی الرٹ رہنے ہدایت کرتے ہوئے کہا ہے کہ شہر میں رین ایمرجنسی نافذ ہے۔

واسا حکام کے مطابق نالہ لئی میں پانی کے بہاؤ کو مانیٹر کیا جارہا ہے ۔ کٹاریاں میں پانی کا بہاؤ 5 فٹ ، گوالمنڈی میں 3 فٹ ہے۔ نشیبی علاقوں میں عملہ ہیوی مشینری کے ساتھ موجود ہے۔

یاد رہے کہ منگل کو بھی راولپنڈی میں 230ملی میٹر بارش کے بعد گلیاں اور سڑکیں ندی نالوں میں بدل گئیں تھیں ، گاڑیاں ڈوب گئیں ، نشیبی علاقوں میں پانی گھروں میں داخل ہوگیا تھا ۔

راول پنڈی میں گھر میں کرنٹ لگنے اور اسلام آباد میں چھت گرنے سے 2 افراد جان سے گئے۔