وفاقی آئینی عدالت پاکستان میں نئے عدالتی سال27- 2026 کا آغاز

اسلام آباد (صداۓ سچ نیوز) وفاقی آئینی عدالت پاکستان میں نئے عدالتی سال27-2026 کے آغاز کے موقع پر ایک پروقار تقریب منعقد ہوئی، جس میں چیف جسٹس وفاقی آئینی عدالت پاکستان امین الدین خان ، معزز جج صاحبان آئینی عدالت، رجسٹرار، اٹارنی جنرل پاکستان، وائس چیئرمین پاکستان بار کونسل، صدر سپریم کورٹ بار ایسوسی ایشن، عدالت کے اعلیٰ افسران و اہلکاران اور وکلا برادری نے شرکت کی۔

اس موقع پر اٹارنی جنرل منصور عثمان اعوان نے وفاقی آئینی عدالت کے ادارہ جاتی سفر کو اہم قرار دیتے ہوئے آئینی سوالات کے مؤثر تصفیے، بنیادی حقوق کے تحفظ، جدید ٹیکنالوجی کے استعمال اور عوامی اعتماد کے فروغ کی اہمیت اجاگر کی۔ انھوں نے کہا کہ عدالت کے فیصلے آئین کی تشریح اور ریاستی اختیارات کے تعین پر دور رس اثرات مرتب کرتے ہیں۔

وائس چیئرمین پاکستان بار کونسل پیر محمد مسعود چشتی نے آئینی استحکام، قانون کی حکمرانی، عدلیہ کی آزادی اور فوری و منصفانہ انصاف کی فراہمی کی اہمیت پر زور دیا۔ انھوں نے عدالت کی جانب سے آئینی ذمہ داریوں کی انجام دہی میں سنجیدگی، توازن اور آئینی بصیرت کو قابلِ تحسین قرار دیا۔

صدر سپریم کورٹ بار ایسوسی ایشن ہارون الرشید نے امید ظاہر کی کہ عدالت گذشتہ برس کی طرح آئندہ بھی آئین کی بالادستی، قانون کی حکمرانی، بنیادی حقوق کے تحفظ، بروقت انصاف کی فراہمی اور عوامی اعتماد کے استحکام میں مؤثر کردار ادا کرتی رہے گی۔

چیف جسٹس وفاقی آئینی عدالت پاکستان امین الدین خان نے کہا کہ نئے عدالتی سال کا آغاز آئینی ذمہ داری، عدالتی آزادی، شفافیت اور عوامی اعتماد کے استحکام کے پختہ عزم کے ساتھ کیا جا رہا ہے۔ انھوں نے بتایا کہ تقریباً دس ماہ کی مختصر مدت میں عدالتی و انتظامی ڈھانچے، قواعد و ضوابط، نئی ڈائریکٹوریٹ کے قیام ، جدید عدالتی نظام، تحقیق و ترجمہ اور چاروں صوبوں میں رجسٹریوں کے قیام کے ضمن میں مؤثر اقدامات کیے گئے ہیں تاکہ آئینی انصاف تک رسائی مزید آسان بنائی جا سکے۔

چیف جسٹس نے عدالت کے بڑھتے ہوئے بین الاقوامی روابط کا ذکر کرتے ہوئے ترکیہ کی آئینی عدالت کے صدر، بنگلہ دیش کے اعلیٰ سطحی اور استنبول بار ایسوسی ایشن نمبر ۲کے وفود کے دوروں، سینٹ پیٹرزبرگ کے بین الاقوامی قانونی اجتماع میں شرکت اور ترک دنیا کی آئینی عدالتوں کی مجلس کی طرف سے وفاقی آئینی عدالت پاکستان کو مبصر کا درجہ ملنے کو اہم ادارہ جاتی پیش رفت قرار دیا۔ ان کا مزید کہنا تھا کہ عدالت آئین کی بالادستی، قانون کی حکمرانی، غیر جانب داری، عدالتی وقار اور عوامی اعتماد کے فروغ کے لیے اپنی آئینی ذمہ داریاں پوری کرتی رہے گی۔

اختتام پر اس عزم کا اعادہ کیا گیا کہ وفاقی آئینی عدالت پاکستان، اسلامی جمہوریہ پاکستان کے آئین سے کامل وفاداری کے ساتھ، آزادی، غیر جانب داری، شفافیت اور عدالتی وقار کے مسلمہ اصولوں کے تحت اپنی آئینی ذمہ داریاں انجام دیتی رہے گی۔