روضۂ معصومۂ سندھ کے جاری ترقیاتی کام پر زائرین خدمت کمیٹی کا اظہارِ اطمینان

کراچی(صداۓ سچ نیوز ) زائرین خدمت کمیٹی سندھ نے جمعرات کو منعقدہ اپنے آن لائن اجلاس میں اگھم کوٹ، ضلع بدین میں واقع روضۂ معصومۂ سندھ، بی بی خدیجہ ماہم سلام اللہ علیہا، دخترِ امام موسیٰ کاظم علیہ السلام پر جاری تعمیراتی و ترقیاتی کام پر اطمینان کا اظہار کرتے ہوئے محکمہء اوقاف سندھ کے اعلیٰ عملداران کی جانب سے تعمیراتی کام پر کیے گئے اقدامات پر اطمینان کا اظہار کرتے ہوئے زور دیا ہے کہ پورے منصوبے کو بلاتعطل، بروقت اور منظور شدہ ڈیزائن اور لے آؤٹ کے عین مطابق مکمل کیا جائے۔

کمیٹی نے بتایا کہ محکمہ اوقاف سندھ کے زیرِ انتظام رقبہ تقریباً ساڑھے 73 ایکڑ پر محیط ہے، جس میں معصومۂ سندھ بی بی خدیجہ ماہم سلام اللہ علیہا کا روضۂ مبارک اور مخدوم اسماعیل سومرو کا مزار بھی شامل ہے۔ مخدوم اسماعیل سومرو نے اپنی زندگی میں بی بی ماہم خدیجہ سلام اللہ علیہا کی قبرِ مبارک کی خدمت اور دیکھ بھال کے لئے خود کو وقف کیئے رکھا۔ بی بی خدیجہ ماہم سلام اللہ علیہا مقامی طور پر ’’مدینہ والی بی بی‘‘ کے نام سے بھی معروف رہی ہیں۔

اجلاس کو بتایا گیا کہ محکمہ اوقاف سندھ نے 2021ء میں دونوں مزارات اور ان سے ملحقہ علاقے کا انتظام سنبھالا، جس کے بعد بی بی خدیجہ ماہم سلام اللہ علیہا کے روضۂ مبارک اور گردونواح میں تعمیراتی و ترقیاتی کام شروع کیئے گئے جن کا مقصد اس مقدس مقام پر ملک بھر سے آنے والے زائرین کی بہت بڑی تعداد کو بہتر سہولیات فراہم کرنا ہے۔

زائرین خدمت کمیٹی نے اب تک ہونے والی تعمیراتی پیش رفت کو سراہتے ہوئے اس بات پر زور دیا کہ باقی ماندہ تعمیراتی اور ترقیاتی کام کو مزید تیز کیا جائے اور مقررہ مدت کے اندر مکمل کیا جائے۔ کمیٹی نے واضح کیا کہ اس دوران منظور شدہ تعمیراتی نقشے، تعمیر کے معیار اور زائرین کے لئےمختص سہولیات پر کسی قسم کا سمجھوتہ نہیں ہونا چاہیے۔

کمیٹی نے اس امر پر بھی زور دیا کہ تمام ترقیاتی اور تعمیراتی مراحل میں اس مقدس مقام کی تاریخی اور مذہبی حرمت و اہمیت کو اولین ترجیح دی جائے، جبکہ سندھ کے مختلف علاقوں سمیت ملک بھر سے روضۂ مبارک پر حاضری کے لیے آنے والے زائرین کو مناسب اور معیاری سہولیات کی فراہمی یقینی بنائی جائے۔

آن لائن اجلاس میں زائرین خدمت کمیٹی کے اراکین زوار نیاز حسین لغاری، غلام حیدر لغاری، منور حسین خواجہ، میر امداد علی پیرل تالپور، آغا سید مہر علی شاہ، یار محمد لنجوانی، بریگیڈیئر (ر) کرار حسین، علی زیب، مبشر میر، غلام مہدی اور منظر نقوی نے شرکت کی۔

اجلاس میں معروف سندھی اسکالر زوار عبدالستار درس کی جلد اور مکمل صحتیابی کے لیئے خصوصی دعا بھی کی گئی۔کمیٹی نے ان کی علمی و تحقیقی خدمات کو خراجِ تحسین پیش کرتے ہوئے کہا کہ زوار عبد الستار درس نے اپنی تحقیق، کتب، تحریروں اور تقاریر کے ذریعے روضۂ بی بی خدیجہ ماہم سلام اللہ علیہا اور اس کی تاریخی و مذہبی اہمیت کو وسیع پیمانے پر اجاگر کرنے میں انتہائی اہم کردار ادا کیا ہے۔

زوار عبد الستار درس اس وقت عارضۂ قلب کے باعث ہسپتال میں زیرِ علاج ہیں اور ان کی بائی پاس سرجری متوقع ہے۔ کمیٹی کے اراکین نے اللہ تعالیٰ سے دعا کی کہ انہیں کامیاب علاج، صحتِ کاملہ و عاجلہ عطا فرمائے تاکہ وہ جلد صحتیاب ہوکر اپنی علمی، تحقیقی اور مذہبی و تنظیمی سرگرمیاں دوبارہ جاری رکھ سکیں۔