ایران امریکا جنگ کے پہلے مہینے عرب ممالک کی معیشتوں کو 150 ارب ڈالر کا نقصان ہوا، نمائندہ اقوام متحدہ

اقوام متحدہ کے اقتصادی و سماجی کمیشن برائے مغربی ایشیا (ESCWA) کی ایگزیکٹو سیکرٹری رانیا المشاط کے مطابق ایران امریکا جنگ کے پہلے مہینے عرب ممالک کی معیشتوں کو 150 ارب ڈالر کا نقصان ہوا جو خطے کی مجموعی ملکی پیداوار (GDP) کے تقریباً 4 فیصد کے برابر ہے۔

انہوں نے کہا کہ آبنائے ہرمز اور باب المندب سے بحری آمدورفت کو لاحق خطرات صرف سلامتی کا مسئلہ نہیں بلکہ تجارت، معاشی استحکام اور ضروری اشیا تک رسائی کو بھی متاثر کر رہے ہیں۔

انہوں نے بتایا کہ دنیا میں سمندری راستے سے ہونے والی تیل کی تجارت کا تقریباً 25 فیصد اور  قدرتی گیس (LNG) کی تجارت کا 19 فیصد آبنائے ہرمز سے گزرتا ہے، اس لیے بحری راستوں میں طویل رکاوٹ خطے کی معیشتوں پر مزید دباؤ ڈال سکتی ہے۔