لاہور دنیا کا آلودہ ترین شہر قرار، فضائی آلودگی نے دہلی کو بھی لپیٹ میں لے لیا، زہریلی اسموگ سے شہریوں کی صحت خطرے میں

لاہور(صداۓ سچ نیوز) پاکستان اور شمالی بھارت کے مختلف علاقوں میں فضائی آلودگی کی شدت خطرناک حد تک بڑھ گئی ہے، جس کے نتیجے میں لاہور دنیا کے آلودہ ترین شہروں کی فہرست میں پہلے نمبر پر آگیا ہے، جبکہ بھارتی دارالحکومت نئی دہلی بھی زہریلی اسموگ کی لپیٹ میں ہے۔

سوئس ادارے آئی کیو ایئر (IQAir) کے مطابق منگل کی صبح لاہور کا ایئر کوالٹی انڈیکس (AQI) 447 ریکارڈ کیا گیا، جو فضائی آلودگی کی انتہائی تشویشناک سطح کو ظاہر کرتا ہے۔

رپورٹ کے مطابق لاہور کی فضا میں موجود انتہائی باریک اور مضر صحت ذرات پی ایم 2.5 کی مقدار عالمی ادارۂ صحت کی سالانہ تجویز کردہ حد سے تقریباً 60 گنا زیادہ ہوگئی ہے۔ یہ ذرات سانس کے ذریعے پھیپھڑوں میں داخل ہوکر دل اور سانس کی سنگین بیماریوں کا سبب بن سکتے ہیں۔

ماحولیاتی حکام کے مطابق درجہ حرارت میں کمی اور ہواؤں کی رفتار سست ہونے سے آلودہ ذرات فضا میں جمع ہو رہے ہیں۔ گاڑیوں کا دھواں، تعمیراتی سرگرمیاں، صنعتی اخراج اور فصلوں کی باقیات جلانے کے واقعات بھی آلودگی میں اضافے کی اہم وجوہات ہیں۔