کِیا اسپورٹیج ایل ہائبرڈ کی قیمتوں میں 8 لاکھ روپے تک بڑی کمی کا اعلان

اسلام آباد (صداے سچ نیوز) کِیا پاکستان نے اپنی مقبول ہائبرڈ ایس یو وی اسپورٹیج ایل کے دونوں ماڈلز کی قیمتوں میں 7 لاکھ سے 8 لاکھ روپے تک نمایاں کمی کا اعلان کر دیا ہے، جس سے نئی گاڑی خریدنے کے خواہشمند صارفین کو بڑا ریلیف ملے گا۔

کمپنی کی جانب سے جاری کردہ نئی قیمتوں کا اطلاق 3 نومبر سے ہو گیا ہے، جس کے تحت اسپورٹیج ایل کے 1.6 ٹی ایف ڈبلیو ڈی ہائبرڈ اور 1.6 ٹی اے ڈبلیو ڈی ہائبرڈ ماڈلز شامل ہیں۔

نئی قیمتوں کے مطابق اسپورٹیج ایل ایف ڈبلیو ڈی ہائبرڈ کی سابقہ قیمت ایک کروڑ 21 لاکھ 99 ہزار روپے تھی، جس میں 7 لاکھ روپے کمی کے بعد نئی قیمت ایک کروڑ 14 لاکھ 99 ہزار روپے مقرر کر دی گئی ہے۔

اسی طرح اسپورٹیج ایل اے ڈبلیو ڈی ہائبرڈ کی قیمت میں 8 لاکھ روپے کی کمی کی گئی ہے، جس کے بعد اس کی قیمت ایک کروڑ 32 لاکھ 99 ہزار روپے سے کم ہو کر ایک کروڑ 24 لاکھ 99 ہزار روپے ہو گئی ہے۔

لکی موٹر کارپوریشن کے مطابق رعایتی قیمتوں سے فائدہ اٹھانے کے لیے صارفین کو کمپنی کے ڈیلر مینجمنٹ سسٹم کے ذریعے نئی بکنگ کروانا ہوگی اور 30 نومبر 2026ء تک مکمل ادائیگی کرنا لازمی ہوگا۔

کمپنی نے واضح کیا ہے کہ نئی قیمتوں میں فریٹ اور انشورنس کے اخراجات شامل نہیں ہیں، جبکہ گاڑی کی ڈیلیوری کے وقت لاگو ہونے والے اضافی سرکاری ٹیکسز، ڈیوٹیز اور دیگر واجبات بھی خریداروں کو ادا کرنا ہوں گے۔

کِیا کی جانب سے قیمتوں میں اس نمایاں کمی کو محدود مدت کی خصوصی پیشکش قرار دیا گیا ہے۔