افغانستان میں طالبان کا موسیقی کیخلاف کریک ڈاؤن جاری، خوست میں سیکڑوں موسیقی کے آلات نذرِ آتش کردیے

کابل (صداۓ سچ نیوز) افغانستان میں طالبان کا موسیقی اور فنونِ لطیفہ کے خلاف کریک ڈاؤن جاری ہے۔

طالبان حکام کی جانب سے صوبہ خوست میں سیکڑوں موسیقی کے آلات نذرِ آتش کردیے گئے۔ طالبان حکام کے مطابق گٹار، ہارمونیم، ایمپلی فائر اور لاؤڈ اسپیکرز سمیت 650 آلات ضبط کیے گئے  جن میں کئی شادیوں سے پکڑے گئے تھے۔

طالبان کا مؤقف ہے کہ موسیقی غیر اسلامی اور معاشرے خصوصاً نوجوانوں کے لیے نقصان دہ ہے، اس لیے کارروائیاں جاری رہیں گی۔

خیال رہے کہ طالبان کی 2021 میں اقتدار میں واپسی کے بعد سے موسیقی، سینما اور دیگر فنون پر سخت پابندیاں عائد ہیں جس کے باعث متعدد فنکار اور موسیقار ملک چھوڑنے پر مجبور ہوچکے ہیں۔