بی آئی ایس پی کی مالی معاونت خیرات نہیں بلکہ مستحق خاندانوں کا حق ہے، روبینہ خالد

بدین (صداے سچ نیوز) چیئرپرسن بینظیر انکم سپورٹ پروگرام (بی آئی ایس پی) سینیٹر روبینہ خالد نے کہا ہے کہ بی آئی ایس پی کی مالی معاونت خیرات نہیں بلکہ مستحق خاندانوں کا حق ہے، ملک بھر میں 6 کروڑ سے زائد افراد اس پروگرام سے مستفید ہو رہے ہیں، جبکہ بینظیر ہنرمند پروگرام کے ذریعے مستحق خاندانوں کو روزگار کے مواقع فراہم کیے جائیں گے۔

دورہ بدین کے دوران سول سوسائٹی کی خواتین نمائندگان اور مقامی بلدیاتی نمائندوں سے ملاقات میں سینیٹر روبینہ خالد نے ان کے مسائل اور تجاویز سنیں اور بی آئی ایس پی کے مختلف اقدامات سے آگاہ کیا۔ بعد ازاں ڈپٹی کمشنر آفس میں میڈیا سے گفتگو کرتے ہوئے انہوں نے کہا کہ شہید محترمہ بینظیر بھٹو کے وژن کے مطابق بی آئی ایس پی شفاف انداز میں کام کر رہا ہے اور اس کی باقاعدہ نگرانی کی جاتی ہے۔

انہوں نے بتایا کہ بینظیر تعلیمی وظائف پروگرام سے ایک کروڑ 20 لاکھ بچے جبکہ بینظیر نشوونما پروگرام کے تحت 22 لاکھ خواتین مستفید ہو رہی ہیں۔ ان کا کہنا تھا کہ قومی شناختی کارڈ شہید ذوالفقار علی بھٹو کا عوام کے لیے ایک عظیم تحفہ ہے اور بی آئی ایس پی کے ذریعے خیبر پختونخوا سمیت ملک بھر میں بڑی تعداد میں خواتین شناختی کارڈ بنوا کر پروگرام میں رجسٹرڈ ہو رہی ہیں۔

چیئرپرسن بی آئی ایس پی نے کہا کہ بینظیر ہنرمند پروگرام کے تحت مستحق خاندانوں، خصوصاً خواتین اور نوجوانوں کو مارکیٹ کی ضروریات کے مطابق فنی و پیشہ ورانہ تربیت فراہم کی جائے گی تاکہ وہ روزگار کے بہتر مواقع حاصل کرکے معاشی طور پر خودمختار بن سکیں۔

ڈیجیٹل والٹ نظام کے حوالے سے سینیٹر روبینہ خالد نے بتایا کہ 1 LINK کے ذریعے انٹرآپریبلٹی کی سہولت فراہم کی جا رہی ہے، جس کے تحت خواتین کسی ایک بینک یا علاقے تک محدود نہیں رہیں گی بلکہ ملک بھر میں شریک بینکوں کے مجاز ریٹیلرز سے اپنی رقم وصول کر سکیں گی۔ اس نظام سے ادائیگیوں میں شفافیت، سہولت اور مالی شمولیت کو فروغ ملے گا۔

اس موقع پر انہوں نے سول سوسائٹی کی خواتین نمائندگان کی شکایات اور مسائل بھی سنے اور متعلقہ افسران کو ترجیحی بنیادوں پر ان کے حل کی ہدایت کی۔

ملاقات میں ارکان صوبائی اسمبلی حاجی تاج محمد ملاح، میر اللہ بخش ٹالپر، ارباب امان اللہ، تنزیلہ ام حبیبہ قمبراں اور بی بی یاسمین شاہ سمیت ایڈیشنل ڈپٹی کمشنر کاشف رضا منگی، ڈسٹرکٹ انفارمیشن آفیسر سرفراز سموں، بی آئی ایس پی افسر عبدالقدیر مہیسر، سول سوسائٹی اور بلدیاتی نمائندگان بھی موجود تھے۔