بجٹ اہداف پر اتفاق رائے نہیں ہوسکا، آئی ایم ایف مشن کے پاکستان میں قیام میں توسیع

آئی ایم ایف مشن کے پاکستان میں قیام میں دو دن کی توسیع کردی گئی۔ نئےمالی سال کےبجٹ پر مشاورت جاری رہےگی ۔ فریقین کے درمیان بجٹ اہداف پر تاحال مکمل اتفاق رائے نہیں ہو سکا۔ چند نکات پر مذاکرات جاری ہیں۔

ذرائع کے مطابق آئی ایم ایف نے پیٹرولیم لیوی ہدف میں 18 فیصد اضافے کی سفارش کی ہے۔ آئندہ مالی سال میں پیٹرولیم لیوی 100 روپے فی لیٹر تک جانے کا امکان ہے۔ پیٹرولیم لیوی ہدف 1730 ارب روپے مقرر کرنے کی تجویز ہے۔

آئی ایم ایف نے صوبوں کو اضافی 430 ارب روپے ریونیو جمع کرنے کا ہدف دیدیا۔ صوبوں سے وفاق کو تقریباً دو ٹریلین روپے سرپلس دینے کا بھی مطالبہ کیا گیا ہے۔ ایف بی آر کیلئے آئندہ مالی سال میں 15 ہزار 264 ارب روپے ٹیکس وصولی کا ہدف رکھا جائے گا۔

دسمبر 2026 تک ایف بی آر کا ششماہی ہدف 7 ہزار 22 ارب روپے ہوگا ۔ آئندہ مالی سال ٹیکس آڈٹ سے 95 ارب روپے اضافی آمدن حاصل کرنے کا پلان  ہے۔ چینی، سیمنٹ، تمباکو اور کھاد سیکٹر سے مزید 50 ارب روپے ریکوری کا تخمینہ ہے ۔ دفاعی بجٹ دو ہزار 665 ارب روپے ، وفاقی ترقیاتی پروگرام کیلئے 986 ارب مختص ہونے کا امکان ہے۔

 ذرائع کے مطابق آئندہ مالی سال میں مہنگائی 8.4 فیصد رہنے کا تخمینہ ہے بی آئی ایس پی کی رقم ساڑھے 14 ہزار سے بڑھا کر 18 ہزار روپے کرنے پرعارضی اتفاق ہوا ہے۔

حکام نے نئی آٹو پالیسی کا مسودہ آئی ایم ایف کے ساتھ شیئر کرتے ہوئے بتایا 2026 سے 2031 کے دوران ماحول دوست الیکٹرک گاڑیوں کا فروغ ترجیح قرار دیا گیا ہے۔ برقی کاروں اور موٹرسائیکلز پر ٹیکس صرف ایک فیصد، الیکٹرک ٹرکوں ، بسوں ، پک اپ ، ڈبل کیبن ، ٹریکٹرز سمیت دیگر گاڑیوں پر زیادہ ٹیکس عائد کیا جائے گا۔ آٹو سیکٹر پر اس وقت اوسط ٹیرف تقریباً 10.6 فیصد ہے۔ 2030 تک ٹیکس کی شرح 6 فیصد پر لانے کی تجویز ہے۔