پاک چین برادرانہ تعلقات کے 75 سال مکمل ہونے پر قومی اسمبلی میں قرارداد منظور

پاکستان اور چین کے درمیان برادرانہ تعلقات کے 75 سال مکمل ہونے پر قومی اسمبلی میں قرارداد منظور کرلی گئی۔ حکومت اور اپوزیشن نے یک زبان ہو کر چین کو پاکستان کا بہترین دوست اور شراکت دارقرار دیا۔

قومی اسمبلی اجلاس میں قرارداد وفاقی وزیر برائے پارلیمانی امور طارق فضل چوہدری نے پیش کی جو متفقہ طور پر  منظورکر لی گئی ۔ اس موقع پر چین کا اعلیٰ پارلیمانی وفد قومی اسمبلی پہنچا تو ارکانِ اسمبلی نے ڈیسک بجا کر اس کا خیرمقدم کیا ۔

اسپیکر ایازصادق نے کہا ہمارے چین سے معزز مہمان آئے ہیں جو اسپیکر باکس میں تشریف فرما ہیں۔ دل کی اتھاہ گہرائیوں سے اپنے برادر ملک کے وفد کا خیرمقدم کرتے ہیں۔

یہ بھی پڑھیں: ڈیزل کی قیمتوں میں اضافہ، 8 ٹرینیں عارضی طور پر بند

اپوزیشن لیڈر محمود خان اچکزئی کا کہنا تھا حکومت کے ساتھ اختلافات کے باعث ہم بائیکاٹ پر تھے ۔ تاہم چینی دوستوں کو خوش آمدید کہنے کیلئے بائیکاٹ مؤخر کیا ۔ چین پاکستان کا بہترین دوست ہے اس کے احسانات کبھی نہیں بھولیں گے ۔

وفاقی وزیر قانون اعظم نذیر تارڑ نے بھی چینی وفد کو خوش آمدید کہا ۔ سید نوید قمر نے کہا کہ چین پاکستان کا بہترین شراکت دار ہے۔قرارداد کی منظوری کے بعد پاکستان تحریک انصاف کے ارکان ایوان سے باہر چلے گئے ۔ پیپلز پارٹی کی رہنما آصفہ بھٹو نے چینی وفد کے پاس جا کر ملاقات کی ۔