گوجرخان میں دن دہاڑے فائرنگ، معروف تاجر سمیت دو بھائی قتل

گوجرخان (صداۓ سچ نیوز) معروف تاجر ملک محبوب حسین اور انکے بھاہی محمود حسین کے قتل، کا مقدمہ درج کر لیا
ریلوے روڈ پر پیش آنے والے اندوہناک فائرنگ کے واقعہ میں معروف تاجر ملک محبوب حسین اور ان کے بھائی ملک محمود حسین کو قتل کر دیا گیا، جبکہ واقعہ کا مقدمہ تھانہ گوجرخان میں زیر دفعہ 302، 109 اور 34 ت پ کے تحت درج کر لیا گیا ہے۔ پولیس نے مقدمہ مقتول ملک محبوب حسین کے بیٹے نعمان شہزاد کی مدعیت میں درج کرتے ہوئے ملزمان کی گرفتاری کیلئے کارروائی شروع کر دی ہے۔

ایف آئی آر کے مطابق ریلوے روڈ پر قائم “ایم حسین محبوب کریانہ مرچنٹ سٹور” پر نعمان شہزاد اپنے والد ملک محبوب حسین اور چچاؤں محمود حسین و شاہد حسین کے ہمراہ موجود تھا کہ شام تقریباً 4 بج کر 50 منٹ پر سرخ رنگ کی بغیر نمبر موٹر سائیکل پر سوار احسن نصیر اور معظم نصیر پسران نصیر احمد پٹواری موقع پر پہنچے۔ کہ معظم نصیر موٹر سائیکل سے اتر کر دکان کی طرف آیا اور آتے ہی ملک محبوب حسین کو للکارتے ہوئے کہا کہ “آج تمہیں میرے والد کے خلاف مقدمہ درج کروانے اور گرفتار کرانے کا مزہ چکھاتا ہوں”۔

مدعی کے مطابق اسی دوران معظم نصیر نے پستول 30 بور نکال کر فائرنگ شروع کر دی۔ فائر لگنے سے ملک محمود حسین شدید زخمی ہو کر گر پڑے جبکہ ملزم نے بعد ازاں کاؤنٹر کے قریب موجود ملک محبوب حسین پر بھی اندھا دھند فائرنگ کر دی جس کے نتیجے میں وہ موقع پر ہی دم توڑ گئے۔ واقعہ کے بعد ملزمان فائرنگ اور دھمکیاں دیتے ہوئے موٹر سائیکل پر فرار ہو گئے۔

زخمیوں کو فوری طور پر تحصیل ہیڈکوارٹر ہسپتال گوجرخان منتقل کیا گیا جہاں ملک محمود حسین بھی زخموں کی تاب نہ لاتے ہوئے جاں بحق ہو گئے۔ ایف آئی آر میں مؤقف اختیار کیا گیا ہے کہ چند روز قبل پیش آنے والے ٹریفک حادثہ کے مقدمہ اور اس میں نصیر احمد پٹواری کی گرفتاری کی رنجش پر یہ قتل کیا گیا,۔