فیلڈ مارشل عاصم منیر کا دورہ تہران کسی مثبت یا منفی پیغام کی ترسیل کے حوالے سے نہیں تھا، ایران

تہران (صداۓ سچ نیوز) ایران کی وزارت خارجہ کے ترجمان اسماعیل بقائی نے کہا ہے کہ پاکستان کے آرمی چیف فیلڈ مارشل عاصم منیر کا دورہ تہران کسی مثبت یا منفی پیغام کی ترسیل کے لیے نہیں تھا۔

ہفتہ وار پریس کانفرنس میں اسماعیل بقائی نے کہا کہ فیلڈ مارشل کا دورہ خطے میں کشیدگی کم کرنے کے لیے پاکستان کی کوششوں کا حصہ تھا، انہوں نے کہا کہ پاکستان ایک دوست اور ہمسایہ ملک کی حیثیت سے حالیہ مہینوں میں کشیدگی میں کمی کے لیے کردار ادا کر رہا ہے، ترجمان ایرانی وزارت خارجہ نے کہا کہ کشیدگی کم کرنے کی سفارتی کوششوں میں کئی دیگر ممالک بھی کردار ادا کر رہے ہیں۔

امریکا کے ساتھ مذاکرات کے حوالے سے ایرانی وزارت خارجہ کے ترجمان نے کہا کہ تہران کسی بھی پیش رفت کا جائزہ ایران کے قومی مفادات اور ترجیحات کی بنیاد پر لیتا ہے اور متعلقہ حکام کی جانب سے کیے گئے فیصلے ہی آئندہ اقدامات کی بنیاد ہوں گے۔

بقائی نے کہا کہ امریکا کے بیانات اور پالیسیوں میں تضاد اور ابہام پایا جاتا ہے تاہم اس سے ایران اپنے سفارتی اور دیگر دستیاب ذرائع استعمال کرنے سے نہیں رکے گا۔

انہوں نے امریکا اور ایران کے درمیان بنیادی اختلاف کی وضاحت کرتے ہوئے کہا کہ واشنگٹن مذاکرات اور اپنی شرائط مسلط کرنے میں فرق نہیں کرتا اور یہ سمجھتا ہے کہ وہ دوسرے ممالک پر اپنے مطالبات نافذ کر سکتا ہے لیکن یہ طریقہ ایران کے ساتھ نہیں چلے گا۔

اسماعیل بقائی نے مزید کہا کہ تہران مخالف فریق کی سرگرمیوں پر گہری نظر رکھے ہوئے ہیں اور ایرانی مسلح افواج کسی بھی جارحیت کا جواب دینے سے گریز نہیں کریں گی۔