جمعیت القریش میٹ ویلفیئر ایسوسی ایشن کے وفد کی وزیراعظم کے مشیر برائے ٹورزم سردار یاسر الیاس سے ملاقات

اسلام آباد (صداۓ سچ نیوز) آل پاکستان جمعیت القریش میٹ ویلفیئر ایسوسی ایشن کے وفد نے صدر خورشید احمد قریشی کی سربراہی میں وزیراعظم کے مشیر برائے ٹورزم سردار یاسر الیاس خان سے ان کے دفتر میں ملاقات کی۔ ملاقات میں اسلام آباد میں سلاٹر ہاؤس، ہول سیل پولٹری منڈی اور کیٹل منڈی کے قیام سمیت گوشت، پولٹری اور مویشیوں کے کاروبار سے وابستہ تاجروں کو درپیش مسائل پر تفصیلی گفت و شنید ہوئی۔

وفد نے کہا کہ اسلام آباد کے اندر سلاٹر ہاؤس ہونا چاہیے، کیونکہ اسلام آباد کی تقریباً 25 لاکھ آبادی کو گوشت کی بہتر اور صحت مند فراہمی کے لیے جدید سلاٹر ہاؤس کی اشد ضرورت ہے۔ جمعیت القریش میٹ ویلفیئر ایسوسی ایشن، جو اس شعبے کی اہم اسٹیک ہولڈر ہے، کا بھی بنیادی مطالبہ یہی ہے کہ اسلام آباد میں سلاٹر ہاؤس قائم کیا جائے۔

وفد میں چیئرمین جمعیت القریش پاکستان عبداللہ قریشی، جنرل سیکرٹری جمعیت القریش میٹ ویلفیئر ایسوسی ایشن و چیئرمین ہول سیل پولٹری ایسوسی ایشن اسلام آباد سردار ظہیر، صدر اسلام آباد پولٹری ریٹیلرز ایسوسی ایشن محمود حسین شاہ، نائب صدر عبدالعزیز قریشی، نائب صدر زاہد مسعود خان، نائب صدر محمد آصف راجپوت، ایگزیکٹو ممبر افتخار احمد، ایگزیکٹو ممبر حارث قریشی، ایگزیکٹو ممبر راجہ ریاض اور کمر خالد سمیت دیگر عہدیداران شامل تھے۔

سردار یاسر الیاس خان نے وفد کو مسائل کے حل اور متعلقہ حکام سے بات چیت کے لیے ہر ممکن تعاون کی یقین دہانی کرائی۔