ایم کیو ایم رہنما زاہد ملک کا سندھ میں کرپشن اور اقربا پروری کا حساب دینے کا مطالبہ

اسلام آباد (صداۓ سچ نیوز) مرکزی رہنماء ایم کیو ایم پاکستان زاہد ملک نے صوبائی وزیر اطلاعات شرجیل میمن کے بیان پر ردعمل دیتے ہوئے کہا کہ پیپلزپارٹی سندھ میں اپنی کرپشن اور بیڈ گورنسس کو چھپانے کے لئے کسی جمہوری و سیاسی قوت کے پرامن احتجاج کو اپنی ڈکٹیٹر شپ کے ذریعے کچلنے کے خواب دیکھنا چھوڑ دے۔ پڑھی لکھی بانیان پاکستان کی اولادوں کے سامنے ادھر تم اور ادھر ہم یا سندھو دیش کا نعرہ چلنے والا دور نہیں رہا۔

زاہد ملک نے اپنے ایک جاری بیان میں کہا کہ انتظامی یونٹس اور نئے صوبوں کا قیام ایم کیو ایم پاکستان کے منشور کا حصہ ہے اور ایم کیو ایم اپنے فکر وفلسفہ کی بدولت اس ملک سے جاگیردارانہ وڈیرا نہ گلہ سڑا نظام پاکستان سے خاتمے تک اپنے اس جدو جہد سے پیچھے ہٹنے والی نہیں۔

انھوں نے کہا کہ اس ملک میں اٹھانوے فیصد متوسط طبقے کے حقوق کا حصول کی جنگ پیپلزپارٹی کی سیاسی موت ہے۔ زاہد ملک نے کہا کہ شرجیل میمن نے جس طرح اس ملک سے کرپشن کا مال لانچوں کے ذریعے باہر بھیجا تھا، اس کو واپس سرکاری خزانے میں واپس جمع کرائے اور قوم کو اس کا حساب دے۔ زاہد ملک نے مزید کہا کہ سندھ میں کرپشن اور اقربا پروری کا حساب دینا پڑے گا۔