چیئرمین پیمرا کی تقرری کے عمل کو تیز کیا جائے، قائمہ کمیٹی قومی اسمبلی کی ہدایت

اسلام آباد(صدائے سچ نیوز) قومی اسمبلی کی قائمہ کمیٹی برائے اطلاعات و نشریات نے پاکستان ٹیلی ویژن (پی ٹی وی) کے لائسنس فیس کے خاتمے کے بعد اضافی مالی وسائل کے نئے ذرائع تلاش کرنے پر زور دیا ہے تاکہ قومی نشریاتی ادارے کے انتظامی اور عملی اخراجات پورے کیے جا سکیں۔

یہ اجلاس چیئرمین کمیٹی پلین بلوچ، ایم این اے کی صدارت میں پی ٹی وی ہیڈ کوارٹرز اسلام آباد میں منعقد ہوا۔ اجلاس میں سیکرiٹری اطلاعات و نشریات نے کمیٹی کو بریفنگ دیتے ہوئے بتایا کہ پی ٹی وی کی موجودہ انتظامیہ ادارے کو خود کفیل بنانے کے لیے انتظامی و مالی اصلاحات پر عمل پیرا ہے۔ اس ضمن میں متعدد تجاویز تیار کی گئی ہیں جن میں پی ٹی وی نیٹ ورک کی ڈیجیٹلائزیشن، نئے اینکرز کی شمولیت اور متحرک مارکیٹنگ حکمتِ عملی شامل ہے۔

سیکریٹری اطلاعات نے مزید بتایا کہ حکومت نے رواں مالی سال کے دوران ادارے کے اخراجات پورے کرنے کے لیے 11 ارب روپے فراہم کیے ہیں، جبکہ ملازمین کی واجبات کی ادائیگی کے لیے مزید گرانٹ کی فراہمی کے لیے وزارت کوششیں کر رہی ہے۔ انہوں نے کہا کہ پی ٹی وی کے پروگرامز میں اصلاحات کے نتیجے میں ناظرین کی تعداد میں اضافہ ہوا ہے۔ انہوں نے یہ بھی بتایا کہ نیا پاکستان ٹی وی عالمی ناظرین کے لیے خبروں کی ضروریات پوری کرے گا اور پاکستان کے خلاف منفی پراپیگنڈے کا مثر جواب دے گا۔

کمیٹی نے وزارت اطلاعات کو ہدایت کی کہ چیئرمین پیمرا کی تقرری کے عمل کو تیز کیا جائے۔ اس موقع پر بتایا گیا کہ اس سلسلے میں عمل درآمد جاری ہے اور شارٹ لسٹ شدہ امیدواروں کے نام پارلیمانی کمیٹی کو بھجوائے جائیں گے تاکہ چیئرمین کا تقرر کیا جا سکے۔

اجلاس میں کمیٹی نے پی ٹی وی کے بعض ملازمین کے خلاف زیرِ التوا انکوائریز جلد مکمل کرنے کی ہدایت بھی دی۔ مزید برآں، کمیٹی نے پاکستان براڈ کاسٹنگ کارپوریشن (پی بی سی) کے کراچی میں جاری پی ایس ڈی پی منصوبوں میں تاخیر کا نوٹس لیتے ہوئے ایک ذیلی کمیٹی تشکیل دی جس کے کنوینر سید امین الحق، ایم این اے ہوں گے۔ ذیلی کمیٹی منصوبوں کا دورہ کرے گی، ان میں درپیش مسائل کی نشاندہی کرے گی اور اپنی سفارشات مرکزی کمیٹی کو پیش کرے گی۔

ذیلی کمیٹی کو یہ بھی ہدایت دی گئی کہ پی بی سی کی جائیدادوں کو آمدنی کے حصول کے لیے مثر طور پر استعمال کرنے کے طریقے تجویز کیے جائیں۔ اجلاس میں پارلیمانی سیکریٹری برائے اطلاعات بیرسٹر دانیال چوہدری، اراکین قومی اسمبلی صلاح الدین جنیجو، رانا انصار، سحر کمال، شاہین، کیتنا حیدر، رومینہ خورشید عالم، عائشہ ناز تنیوئی، کرن عمران دار سمیت وزارت اطلاعات و نشریات کے اعلی افسران نے شرکت کی۔

کمیٹی نے "تحفظِ صحافی و میڈیا پروفیشنلز (ترمیمی) بل 2025” پر بحث بل کے محرک کی عدم حاضری کے باعث مخر کر دی اور فیصلہ کیا کہ اس بل پر تفصیلی غور آئندہ اجلاس میں کیا جائے گا۔