پنجاب بھر میں 18 اکتوبر تک دفعہ 144 نافذ، احتجاج، ریلیوں اور دھرنوں پر پابندی

لاہور (صدائے سچ نیوز) پنجاب بھر میں 18 اکتوبر تک دفعہ 144 نافذ کر دی گئی، صوبے میں ہر قسم کے احتجاج، جلسے، جلوس، ریلیوں، دھرنوں پر پابندی ہو گی۔

ایک نجی ٹی وی چینل کے مطابق محکمہ داخلہ پنجاب نے دفعہ 144 کے نفاذ کا نوٹی فکیشن جاری کردیا، ترجمان محکمہ داخلہ نے بتایا کہ حکومت پنجاب نے دہشت گردی اور امن عامہ کے خدشات کے پیش نظر احکامات جاری کیے۔

ترجمان کے مطابق صوبے میں ہر قسم کے اسلحہ کی نمائش پر بھی مکمل پابندی عائد ہوگی، اسی طرح دفعہ 144 کے تحت لاؤڈ اسپیکر کے استعمال پر مکمل پابندی ہوگی۔

ترجمان محکمہ داخلہ کا کہنا تھا کہ اشتعال انگیز، نفرت آمیز یا فرقہ وارانہ مواد کی اشاعت و تقسیم پر بھی مکمل پابندی عائد کی گئی ہے۔

ترجمان محکمہ داخلہ کے مطابق دفعہ 144 کے نفاذ کا فیصلہ امن و امان کے قیام، انسانی جانوں اور املاک کے تحفظ کیلئے کیا گیا ہے۔

ترجمان محکمہ داخلہ پنجاب نے بتایا کہ پابندی کا اطلاق شادی کی تقریبات، جنازہ اور تدفین پر نہیں ہوگا۔