کراچی میں 12 دسمبر کو چھٹی سالانہ معصومۂ سندھ امن و بین المذاہب ہم آہنگی کانفرنس منعقد ہوگی

کراچی (صداۓ سچ نیوز) کراچی ایڈیٹرز کلب اور زائرین خدمت کمیٹی، درگاہ معصومۂ سندھ کے مشترکہ زیرِ اہتمام چھٹی سالانہ معصومۂ سندھ امن و بین المذاہب ہم آہنگی کانفرنس ہفتہ 12 دسمبر 2026ء کو شام 5 بجے محمد ابراہیم جویو آڈیٹوریم، محکمہ ثقافت سندھ، کراچی میں منعقد ہوگی، جس میں مختلف مذاہب اور مکاتبِ فکر کے ممتاز علماء، مشائخ، دانشور، ادیب، صحافی اور سماجی شخصیات شرکت کرکے امن، محبت، مذہبی رواداری اور باہمی احترام کی اہمیت پر اظہارِ خیال کریں گی۔
یہ سالانہ کانفرنس حضرت سیدہ خدیجہ ماہم سلام اللہ علیہا بنت حضرت امام موسیٰ کاظم علیہ السلام کی نسبت سے منعقد کی جا رہی ہے، جن کا مزار مبارک سندھ کے تاریخی مقام اگھم کوٹ ضلع بدین میں واقع ہے۔

منتظمین کے مطابق کانفرنس کا مقصد سندھ کی صدیوں پرانی صوفیانہ روایات، مذہبی ہم آہنگی اور اہلِ بیت اطہارؑ کی تعلیمات کی روشنی میں انسانیت دوستی، اخوت اور خدمتِ خلق کے پیغام کو فروغ دینا ہے۔

منتظمین نے کہا کہ موجودہ عالمی حالات میں بین المذاہب مکالمہ اور باہمی احترام وقت کی اہم ترین ضرورت ہیں۔ یہ کانفرنس معاشرے میں نفرت، انتہاپسندی اور عدم برداشت کے خاتمے کے لیے ایک انتہائی مثبت پیغام ثابت ہوگی۔