ورچوئل یونیورسٹی میں اسپرنگ 2026سمسٹر میں داخلوں کا آغاز

اسلام آباد (صدائےسچ نیوز) ورچوئل یونیورسٹی آف پاکستان (VU) نے اسپرنگ 2026 سمسٹر کے لیے داخلوں کے آغاز کا اعلان کر دیا ہے۔

یہ داخلے 5 جنوری 2026 سے پاکستان بھر میں، بیرونِ ملک مقیم پاکستانیوں، آزاد جموں و کشمیر اور گلگت بلتستان کے طلبہ کے لیے کھلے ہیں، جبکہ درخواست جمع کروانے کی آخری تاریخ 20 فروری 2026 ہے۔

اس وقت ہزاروں اوورسیز پاکستانی بیرون ملک رہتے ہوئے نہ صرف ورچوئل یونیورسٹی میں زیرِ تعلیم ہیں بلکہ ایک کثیر زرمبادلہ کی بدولت وطن کی خدمت میں بھی مصروف ہیں۔

ورچوئل یونیورسٹی میں انڈرگریجویٹ، ایسوسی ایٹ ڈگری، ڈپلومہ اور سرٹیفکیٹ پروگرامز کی ایک وسیع رینج میں داخلے دیے جا رہے ہیں، جن میں مختلف بی ایس پروگرامز، ایسوسی ایٹ ڈگری پروگرامز (ADP)، اور پروفیشنل ڈپلومہ و سرٹیفکیٹ کورسز شامل ہیں۔

ریکٹر ورچوئل یونیورسٹی آف پاکستان، پروفیسر ڈاکٹر ناصر محمود نے کہا کہ ورچوئل یونیورسٹی جدید ٹیکنالوجی کے ذریعے نہ صرف پاکستان بلکہ پورے جنوبی ایشیا میں انتہائی کم لاگت پر معیاری اعلیٰ تعلیم فراہم کر رہی ہے، تاکہ معاشرے کے تمام طبقات کو تعلیم تک یکساں رسائی حاصل ہو۔

انہوں نے مزید بتایا کہ ورچوئل یونیورسٹی کے کیمپس اسکردو سے گوادر تک پاکستان کے تمام بڑے شہروں میں قائم ہیں اور تقریباً 140 شہروں میں طلبہ کو تعلیمی و انتظامی سہولیات فراہم کی جا رہی ہیں۔

طلبہ ایک سادہ اور مکمل طور پر آن لائن داخلہ نظام کے ذریعے گھر بیٹھے تمام داخلہ مراحل مکمل کر سکتے ہیں۔ رہنمائی یا معلومات کے خواہشمند افراد اپنے قریبی ورچوئل یونیورسٹی کیمپس کا رخ کر سکتے ہیں، جہاں انہیں بلا معاوضہ سہولت فراہم کی جائے گی۔

ورچوئل یونیورسٹی اس وقت 160,000 سے زائد فعال طلبہ کا اعتماد رکھتی ہے۔ خاص طور پہ اسپرنگ 2026 کے داخلے اُن ملازمت پیشہ افراد، پروفیشنلز اور ایسے طلبہ کے لیے ایک بہترین موقع ہیں جو وقت یا مقام کی پابندیوں کے باعث روایتی تعلیمی اداروں میں تعلیم حاصل نہیں کر سکتے۔

تمام پروگرامز کا پراسپیکٹس اور داخلہ درخواست فارم یونیورسٹی کی آفیشل ویب سائٹ www.vu.edu.pk/apply پر دستیاب ہیں، جبکہ تمام داخلے آن لائن داخلہ نظام کے ذریعے ہی کیے جا رہے ہیں۔

مزید معلومات یا رہنمائی کے لیے طلبہ داخلہ ہیلپ لائن 1288 پر کال کر سکتے ہیں، ای میل info@vu.edu.pk پر رابطہ کر سکتے ہیں، یا یونیورسٹی کے تمام سرکاری سوشل میڈیا چینلز کے ذریعے بھی معلومات حاصل کر سکتے ہیں۔
اہلیت کے معیار، پروگرامز اور داخلہ طریقہ کار سے متعلق مزید تفصیلات بھی یونیورسٹی ویب سائٹ پر دستیاب ہیں۔