جمعۃ الوداع، عالمی یوم القدس حمایتِ مظلومین، ٹی این ایف جے کی کال پر ملک گیر احتجاجی مظاہرے

اسلام آباد ( صدائے سچ نیوز) تحریکِ نفاذِ فقہ جعفریہ پاکستان کے سربراہ علامہ آغا سید حسین مقدسی کے اعلان کے مطابق قائدِ ملتِ جعفریہ آغا سید حامد علی شاہ موسوی کا قائم کردہ عالمی یوم القدس حمایتِ مظلومین جمعۃ الوداع کو دنیا بھر کی طرح وطنِ عزیز پاکستان میں مظلومینِ عالم سے اظہارِ یکجہتی کے جذبے کیساتھ منایا گیا۔

آغا حسین مقدسی نے اس موقع پر اپنے خصوصی پیغام میں مسلم حکمرانوں پر زور دیا کہ انکی جانب سے عالم اسلام کی خستہ حالی پر زبانی مذمت کافی نہیں لہٰذا وہ مصلحتوں کو بالائے طاق رکھ کر جرات کا مظاہرہ کرتے ہوئے کشمیر و فلسطین سمیت دیرینہ عالمی مسائل کے حل کیلئے اقوام متحدہ پر دباؤ ڈالیں۔

انہوں نے او آئی سی پر زور دیا کہ وہ اپنا ہنگامی اجلاس طلب کرکے صیہونی و بھارتی جارحیت کے مقابلے کے لیے جراتمندانہ پالیسی اختیار کرے۔ آغا مقدسی نے باور کرایا کہ قائدِ ملتِ جعفریہ آغا سید حامد علی شاہ موسوی کی جانب سے عرصہ دراز سے جاری فلسطین و کشمیری حریت پسندوں سمیت پوری دنیا کے مظلومین کی حمایت میں عالمی یوم القدس منانے کا مقصد حقوقِ بشر کے دعویدار عالمی اداروں کے ضمیر کو جھنجھوڑنا ہے۔

سربراہ ٹی این ایف جے نے یاد دلایا کہ آقائے موسوی نے بارہا متوجہ کیا تھا کہ اگر مسلم ممالک نے عالمی استعمار اور اسکے بغل بچوں اسرائیل و بھارت کی مسلسل جارحیت کے مقابلے میں ایکا نہ کیا تو ایک ایک کرکے سب کی باری آئیگی. در ایں اثناء اس موقع پر وفاقی و صوبائی دارالحکومتوں سمیت ملک بھر کے تمام چھوٹے بڑے شہروں میں قبلۂ اول کی آزادی، مظلومینِ کشمیر و فلسطین کی حمایت، صیہونی و بھارتی بربریت اور دہشت گردی کے خلاف احتجاجی مظاہرے اور ریلیاں نکالی گئیں۔

علمائے کرام اور واعظین نے اجتماعات سے خطاب کرتے ہوئے واضح کیا کہ القدس شریف نہ صرف اسلام بلکہ تمام انسانیت کے نزدیک قابلِ احترام ہے جو شعائر اللہ میں شامل ہے، اس کی عزت و حرمت اور صیہونی پنجوں سے بازیاب کرانا تمام عالمِ اسلام کا شرعی و ایمانی فریضہ ہے۔ ٹی این ایف جے راولپنڈی کے زیر اہتمام امام بارگاہ عاشق حسین تیلی محلہ سے علمائے کرام اور سنی شیعہ اکابرین کی قیادت میں احتجاجی ریلی نکالی گئی جس نے مری روڈ کمیٹی چوک میں بڑے احتجاجی جلسے کی شکل اختیار کرلی۔

ریلی کی قیادت مرکزی سینیئر نائب صدر ٹی این ایف جے سید فرزند علی شاہ کاظمی، ریجنل صدر علامہ سید شبیہہ الحسن کاظمی, مرکزی کنوینیر شوکت عباس جعفری، مخدوم سید طفیل سبزواری, ضلعی صدر ملک فخر علی خان ، چیئرمین مختار فورس چوہدری مشتاق ، باوا سید قاسم علی شاہ کاظمی, رابطہ سیکریٹری حسن کاظمی , ذیشان کاظمی ،مولانا وقار نقوی , سید ابو ذیشان نقوی, کشمیری رہنما شجاع گردیزی , نصیر سبزواری ، سلیم بنگش، مسیب عباس بخاری و دیگر رہنما کررہے تھے۔

اس موقع پر مظاہرین سے خطاب کرتے ہوئے علماء نے اس امر پر گہری تشویش کا اظہار کیا کہ ایران پر استعماری حملے اور فلسطین و کشمیر میں بے گناہ مسلمانوں کا قتل عام مسلم حکمرانوں اور عالمی اداروں کی مجرمانہ خاموشی اور سرد مہری سوالیہ نشان ہے ؟ اگر اسکا سدباب نہ کیا گیا تو سب اپنی خیر منائیں۔

شرکائے ریلی نے مختلف بینرز اور پلے کارڈ اور کتبے اٹھا رکھے تھے جن پر القدس کی آزادی تک جنگ رہے گی، امریکی، ہندو سامراج مردہ باد، اسرائیل مردہ باد اور دیگر نعرے درج تھے۔ وفاقی دارالحکومت اسلام آباد میں عالمی یوم القدس حمایتِ مظلومین کے موقع پر نکالی گئی۔

ریلی کی قیادت ناظم الامور فیڈرل کیپیٹل علامہ فخر عابدی , چیئرمین ٹی این ایف جے پولیٹیکل سیل ذوالفقار علی راجہ ، صدر ٹی این ایف جے فیڈرل کیپیٹل علامہ رفاقت حسین نقوی , نائب صدر فیڈرل کیپیٹل مولانا کاظم حسین سبزواری, سیکریٹری جنرل علامہ فصاحت حسین گردیزی , صدر ڈسٹرکٹ ویسٹ سید صادق حسین کاظمی , صدر ڈسٹرکٹ ایسٹ علامہ میثم عباس گردیزی اور دیگر رہنماؤں نے کی جبکہ انوار کاظم ایڈووکیٹ نے مظاہرین سے خطاب اور مظلومین کی حمایت میں پرجوش نعروں کی گونج میں قرارداد منظور کروائی۔

ضلعی انتظامیہ نے ریلی کیلئے خصوصی انتظامات کررکھے تھے۔ اس موقع پر عالمِ اسلام کے مصائب و آلام کے خاتمہ، مسائل کے حل اور وطنِ عزیز پاکستان کی سلامتی، استحکام و ترقی کیلئے خصوصی دعا کی گئی۔