متعدی امراض کا پھیلاؤ روکنے کیلئے غیرمعیاری سرنجز کی تیاری،استعمال پر پابندی کی ہدایت

ایڈز اور ہیپاٹائٹس سی کی روک تھام کے لیے وزیراعظم نے غیر معیاری سرنجز کی تیاری اور استعمال پر پابندی کے حوالے سے قومی حکمت عملی مرتب کرنے کی ہدایت کردی۔

وزیراعظم محمد شہباز شریف کی زیر صدارت اجلاس میں ایڈز اور ہیپاٹائٹس سی جیسے متعدی امراض کی روک تھام کے لیے اٹھائے گئے اقدامات کا جائزہ لیا گیا۔

وزیراعظم نے غیر معیاری سرنجز کی تیاری اور استعمال پر پابندی عائد کرنے، اس عمل میں ملوث افراد اور روک تھام میں مجرمانہ غفلت کے مرتکب اسپتالوں کے خلاف قانونی کارروائی کی ہدایت دی۔

وزیراعظم نے ماہرین پر مشتمل خصوصی کمیٹی تشکیل دینے کی ہدایت کرتے ہوئے کہا کہ کمیٹی اپنی سفارشات مرتب کرتے وقت صوبوں سے مشاورت یقینی بنائے۔

انہوں نے وزارت قانون کو متعلقہ اداروں کے ساتھ مل کر قانونی اور ریگولیٹری فریم ورک میں ضروری ترامیم تجویز کرنے، جبکہ ڈریپ کو میڈیکل آلات کی صنعت سے مشاورت کے بعد پالیسی سفارشات پیش کرنے کی ہدایت بھی کی۔

وزیراعظم کا کہنا تھا کہ قومی سطح پر جامع حکمت عملی، عالمی شراکت داروں کے تعاون، علاج سے متعلق آلات کی مقامی مینوفیکچرنگ اور شعبہ صحت کے عملے کی عالمی معیار کی تربیت سے ہی متعدی امراض پر مؤثر قابو پایا جا سکتا ہے۔