برمنگھم، مسجد کے قریب فائرنگ، 16 سالہ نوجوان شدید زخمی

برمنگھم (صداۓ سچ نیوز) برمنگھم میں مسجد کے قریب فائرنگ سے 16 سالہ لڑکا شدید زخمی ہو گیا۔

تفصیلات کے مطابق بوئیر روڈ پر پیش آنے والے واقعے کی تحقیقات جاری ہیں اور پولیس نے شواہد اور سی سی ٹی وی فوٹیج حاصل کرنا شروع کر دی ہے۔

بدھ کی شام مسجد کے قریب فائرنگ سے زخمی ہونے والے نوجوان کو فوری طور پر تشویش ناک حالت میں اسپتال منتقل کر دیا گیا تھا۔

ویسٹ مڈلینڈز پولیس کے مطابق فائرنگ کا واقعہ بوئیر روڈ پر پیش آیا، جس کے بعد علاقے کو گھیرے میں لے کر تحقیقات شروع کر دی گئیں۔

پولیس نے ابتدائی تحقیقات کے حوالے سے واضح کیا ہے کہ اب تک اس واقعے کا مسجد سے کوئی تعلق سامنے نہیں آیا۔

حکام نے شہریوں سے پُرسکون رہنے کی اپیل کرتے ہوئے کہا ہے کہ تحقیقات جاری ہیں اور کسی بھی نتیجے پر پہنچنے سے قبل شواہد کا مکمل جائزہ لیا جا رہا ہے۔

پولیس نے عینی شاہدین اور واقعے کی ویڈیو فوٹیج رکھنے والے افراد سے بھی رابطہ کرنے کی درخواست کی ہے تاکہ تحقیقات میں مدد مل سکے۔