ایران سے جنگ، مزید فنڈز کیلئے پیٹ ہیگسیتھ اور جنرل ڈین کین کو سینیٹ کے سوالات کا سامنا کرنا ہوگا

واشنگٹن (صداۓ سچ نیوز) ایران سے جنگ کے لیے مزید اربوں ڈالرز کی درخواست پر آج امریکی وزیر جنگ پیٹ ہیگسیتھ اور چیرمین جوائنٹ چیفس آف اسٹاف جنرل ڈین کین کو امریکی سینیٹ پینل کے سوالات کا سامنا کرنا ہوگا۔ 

امریکی میڈیا کے مطابق ممکنہ طور پر پیٹ ہیگسیتھ کو اب تک جنگ میں ہونے والے امریکی جانی نقصان اور زخمی امریکی فوجیوں کی تفصیلات کے سوالات کا سامنا کرنا پڑسکتا ہے۔ 

محکمہ جنگ پینٹاگون کے ترجمان شان پرنیل نے آج ایک بیان میں کہا ہے کہ 7 جولائی سے اب تک کے حملوں میں 100 امریکی فوجی زخمی ہوئے ہیں۔ جب کہ پچھلے ہفتے ایرانی حملوں میں 3 امریکی فوجیوں کی ہلاکت کی تصدیق بھی کی گئی ہے۔

اس سے قبل ایرانی پاسدارانِ انقلاب نے دعویٰ کیا ہے کہ اردن پر ایرانی حملوں میں ہلاک امریکی فوجیوں کی تعداد اس سے کہیں زیادہ ہے جتنی بتائی جا رہی ہے۔ 

واضح رہے کہ یہ جانی نقصان اردن کے علاقے رکبان میں امریکی فوج کے رہائشی کمپلیکس پر ایرانی حملوں میں ہوا۔ امریکا نے اس ایرانی دعوے پر کوئی ردعمل نہیں دیا ہے۔

اسی دوران امریکی میڈیا یہ رپورٹ کرچکا ہے کہ امریکی افواج ابھی اردن کے حملے کے بعد وہاں سے ملنے والے کچھ ناقابل شناخت جسمانی اعضا کا جائزہ لے رہی ہے۔ یہ اس بات کا اشارہ ہے کہ مرنے والوں کی تعداد میں اضافہ ہوسکتا ہے۔