کاکروچ جنتا پارٹی کے حکومت سے کامیاب مذاکرات، احتجاج ختم کردیا

نیو دہلی (صداۓ سچ نیوز) بھارت میں نوجوانوں کی جماعت کاکروچ جنتا پارٹی (سی جے پی) نے حکومت سےکامیاب مذاکرات کے بعد احتجاج ختم کرنےکا اعلان کردیا۔

نوجوانوں کی تحریک مودی حکومت سے مطالبات منوانے میں کامیاب ہوگئی، جین زی کا ایک ماہ سے زائد کا احتجاج رنگ لے آیا۔

طلبا کے احتجاج پر بھارتی وزیر تعلیم دھرمیندر پردھان نے استعفا دے دیا، بھارتی وزیر اعظم مودی اور صدر دروپدی مرمو نے استعفا قبول کرتے ہوئے پرہلاد جوشی کو نیا وزیر تعلیم مقرر کردیا۔

بھارتی وزیرِ تعلیم کے استعفے پر طلبا کا احتجاج جشن میں بدل گیا، طلبا مظاہرین نے ڈھول بجائے، بھنگڑے ڈالے، کاکروچ جنتا پارٹی نے وزیر تعلیم کے استعفے کو جمہوریت کی فتح قرار دیا اور کل مشعل بردار جلوس نکالنے کا اعلان بھی کیا، حکومت سے کامیاب مذاکرات کے بعد نوجوانوں کی تنظیم کاکروچ جنتا پارٹی نے احتجاج ختم کرنے کا اعلان کر دیا ۔

سی جے پی نے پیپر لیک کے اسکینڈل کے بعد بھارتی وزیر تعلیم کے استعفے، خودکشی کرنے والے طالب علموں کے خاندانوں کو معاوضہ دینے اور مظاہرین کے خلاف تشدد میں ملوث پولیس افسران کے خلاف کارروائی کا مطالبہ کیا تھا ، طلبا امتحانی نظام میں خرابیوں اور میڈیکل کالجوں میں داخلہ امتحان کےپرچے لیک ہونے پر نئی دلی کے علاقے جنتر منتر پر احتجاج کر رہے تھے۔

بھارتی اپوزیشن جماعت کانگریس کے رہنما راہول گاندھی نے نریندر مودی سے معافی مانگنے کا مطالبہ کر دیا اور کہا کہ نریندر مودی ماضی بن چکے ہیں ، ماضی کبھی مستقبل کا مقابلہ نہیں کرسکتا۔

راہول گاندھی کا کہنا ہے کہ طلبا کو اپنے دو مطالبات نہیں بھولنے چاہئیں۔ ایک مطالبہ طلبا پر حملے، تشدد اور انہیں مارنے میں شامل افراد کے خلاف کارروائی اور دوسرا مطالبہ ہے اس نظام کے اصل ذمہ دار نریندر مودی کو بھارت کے طلبا سے معافی مانگنی چاہیے.

بھارتی کانگریس رہنما پریانکا گاندھی کا کہنا ہے وزیر تعلیم دھرمیندر پرادھان کا استعفیٰ نوجوانوں کی جیت ہے اور حکمرانوں کے لئے پیغام ہے کہ وہ عوام کی آواز کو دبا نہیں سکتے۔