چہلم شہدائے کربلا کے موقعہ پر معصومہء سندھ کے روضہ پر لاکھوں عزاداران کی شرکت

حیدرآباد (صداۓ سچ نیوز) پوری دنیا کی طرح اگھم کوٹ میں بھی روضہء اطہر معصومہء سندھ پر چہلم شہدائے کربلا بڑے مذہبی، جوش و خروش اور والہانہ مذہبی عقیدت و احترام کے ساتھ بھرپور انداز میں منایا گیا۔

جس میں 19 صفرالمظفر کی شب سے لے کر 20 صفرالمظفر کی شام تک عورتوں، بچوں اور مردوں پر مشتمل ہزاروں پیادل مشی قافلوں نے بھرپور انداز میں نوحہ خوانی و عزاداری کی۔ صرف 19 اور 20 صفرالمظفر کو 2 روز کے اندر 2 لاکھ سے بھی زائد مرد، خواتین اور معصوم بچوں کے سینکڑوں میل پاپیادہ مشی واک کرکے آنے والے قافلوں نے معصومہء سندھ کی بارگاہ میں حاضری دے کر عقیدتوں کے پھول نچھاور کیئے۔

واضح رہے کہ معصومہء سندھ کے روضہ اطہر پر سینکڑوں میل پاپیادہ سفر کرکے آنے والے ان مشی قافلوں کی آمد کا سلسلہ 25 محرم سے ہی شروع ہوگیا تھا، جو گذشتہ روز تک متواتر جاری رہا۔ 19 اور 20 صفرالمظفر کو اگھم کوٹ کی جانب آنے والے جملہ راستوں پر مؤمنین کی جانب سے کئی میل تک کی اراضی میں مؤکب لگائے گئے تھے جن پر دونوں روز بلا وقفہ شربت، پانی، فروٹ اور نیاز کی تقسیم کا سلسلہ مسلسل جاری رہا۔

مذہبی اُمور کمیٹی اگھم کوٹ کے جملہ اراکین نے اپنے جاری کردہ بیان میں حکومتِ سندھ، محکمہء اوقاف سندھ، جملہ سیکیورٹی اداروں، آئی جی سندھ پولیس، ایس ایس پی بدین، ڈی سی بدین اور بالخصوص وزیرِ اعلیٰ سندھ سید مراد علی شاہ کا تہہ دل سے شکریہ ادا کرتے ہوئے کہا ہے کہ ان کی خصوصی ہدایات و تعاون کے بغیر پیادل مشی کرکے آنے والے لاکھوں عزاداران و زائرین کو اتنے وسیع پئمانہ پر سہولیات کی فراہمی کسی بھی صورت میں ممکن نہ تھی۔ انہوں نے امید ظاہر کی مندرجہ بالا صاحبانِ اختیار کا عزاداران و زائرین کو اہم و بنیادی سہولیات فراہم کرنے کا یہ قابلِ تحسین، خصوصی توجہ و تعاون کا سلسلہ بدستور جاری و ساری رہے گا۔