بشکیک میں وزیراعظم شہباز شریف اور ایرانی صدر مسعود پزشکیان کی ملاقات

بشکیک (صداۓ سچ نیوز) وزیراعظم شہباز شریف اور ایرانی صدر مسعود پزشکیان کی بشکیک میں ملاقات ہوئی، جس میں دونوں ممالک کے درمیان قریبی اور دیرنیہ تعلقات کا اعادہ کیا گیا۔

وزیراعظم آفس کے اعلامیے کے مطابق دونوں رہنماؤں کی شنگھائی تعاون تنظیم کے سربراہان مملکت کے اجلاس کے موقع پر ملاقات ہوئی ہے۔

اعلامیے کے مطابق دونوں رہنماؤں کی ملاقات پرتپاک اور دوستانہ ماحول میں ہوئی، جس میں دونوں ممالک کے درمیان قریبی اور دیرنیہ تعلقات کا اعادہ کیا گیا ہے۔

اعلامیے کے مطابق دونوں رہنماؤں نے باہمی تعاون کے تمام شعبوں میں دو طرفہ تعلقات کو مزید مستحکم بنانے کی اہمیت کا ذکر کیا۔ 

اعلامیے کے مطابق ملاقات میں جون میں صدر پزشکیان کے دورۂ پاکستان کے دوران فیصلوں پر عملدرآمد کی اہمیت پر بھی زور دیا۔

دوران ملاقات شہباز شریف اور مسعود پزشکیان نے علاقائی روابط کے فروغ، عوامی سطح پر روابط کے فروغ کی کوششوں کا بھی جائزہ لیا۔

وزیراعظم نے اعادہ کیا کہ پاکستان خطےمیں امن کےقیام کےلیےاپنی مخلصانہ کوششیں جاری رکھے گا۔

وزیراعظم نے مزید کہا کہ فیلڈ مارشل سید عاصم منیر کے حالیہ دورہ تہران اور اُن کے تعمیری روابط سے اچھے نتائج کی امید ہے۔

شہباز شریف نے دوران گفتگو خطے میں پائیدار امن، استحکام کےلیے تحمل اور مسلسل سفارتی رابطوں کی اہمیت پر زور دیا۔

انہوں نے مزید کہا کہ اسلام آباد مفاہمتی یادداشت کے تحت مفاہمت کے عمل کو آگے بڑھانے کی ضرورت ہے، خطے میں دیرپا امن کے قیام کےلیے یہ واحد قابلِ عمل راستہ ہے۔

اعلامیے کے مطابق ایرانی صدر نے علاقائی امن اور سلامتی کےلیے پاکستان کی مسلسل سفارتی کوششوں کو سراہا اور دونوں ممالک کے تعلقات کی پائیدار مضبوطی کو اجاگر کیا۔

مسعود پزشکیان کا کہنا تھا کہ دونوں ممالک کے تعلقات مشترکہ تاریخ، ثقافت، مذہب کی مضبوط بنیادوں پر استوار ہیں۔

انہوں نے مختلف شعبوں میں تعاون کو مزید وسعت دینے کےلیے تہران کی بھرپور خواہش کا اعادہ کیا اور امت مسلمہ میں اتحاد و یکجہتی کے فروغ کی ضرورت و اہمیت کا ذکر کیا۔