لوٹن کونسل کے نئے لیڈر کا انتخاب، امجد علی نے ذمہ داریاں سنبھال لیں

لوٹن (صداۓ سچ نیوز) لبرل ڈیموکریٹ پارٹی کے رہنما کونسلر امجد علی کو 14 ستمبر کو ہونے والے کونسل کے خصوصی اجلاس میں نیا لیڈر منتخب کیا گیا۔

اجلاس میں عدم اعتماد کی تحریک منظور ہونے کے بعد کونسلر امجد علی کو نیا قائد منتخب کیا گیا۔ کونسلر امجد علی 2019 میں پہلی مرتبہ کونسلر منتخب ہوئے تھے اور وہ بارن فیلڈ وارڈ کی نمائندگی کرتے ہیں۔

اس سے قبل وہ کونسل کی مختلف کمیٹیوں میں اہم ذمہ داریاں ادا کر چکے ہیں لوٹن کونسل کی نئی انتظامیہ میں لبرل ڈیموکریٹ، آزاد ارکان کے اتحاد اور کنزرویٹو گروپ کے کونسلرز شامل ہوں گے، جبکہ لیبر گروپ اب کونسل میں باضابطہ اپوزیشن کا کردار ادا کرے گا۔

نئے لیڈر کونسلر امجد علی نے اپنے انتخاب پر خوشی کا اظہار کرتے ہوئے کہا کہ وہ لوٹن کے عوام کی خدمت کو اپنی اولین ترجیح بنائیں گے۔ ان کے مطابق فوری طور پر کونسل میں استحکام پیدا کرنا، عوامی مسائل پر توجہ دینا اور شہریوں کو بہتر سہولیات فراہم کرنا ان کی ترجیحات میں شامل ہے۔

انہوں نے کہا کہ وہ ایسی کونسل چاہتے ہیں جو عوام کی بات سنے، ان کے لیے قابلِ رسائی ہو اور اپنے فیصلوں کے بارے میں واضح اور ایماندارانہ رویہ اختیار کرے۔ کونسلر امجد علی آنے والے دنوں میں نئی کابینہ اور مختلف محکموں کی ذمہ داریوں کا اعلان کریں گے۔
امجد علی کا تعلق ضلع کوٹلی کی تحصیل چڑہوئی سے ہے۔ انھیں اہلیان علاقہ و اپنی کمیونٹی کی طرف سے نیک خواہشات و مبارک باد پیش کی گئی۔