کیپٹن محمد سہیل چوہدری نے آئی جی اسلام آباد کا چارج سنبھال لیا

اسلام آباد (صدائے سچ نیوز) کیپٹن محمد سہیل چوہدری نے بطور انسپکٹر جنرل پولیس اسلام آباد اپنے عہدے کا باقاعدہ چارج سنبھال لیا۔ نئے آئی جی اسلام آباد کی سنٹرل پولیس آفس آمد پر پولیس افسران اور جوانوں نے ان کا پرتپاک استقبال کیا، جبکہ پولیس کے چاق و چوبند دستے نے انہیں سلامی پیش کی۔

سنٹرل پولیس آفس میں کمان کی تبدیلی کے حوالے سے پروقار تقریب منعقد ہوئی، جس کے بعد کیپٹن محمد سہیل چوہدری نے آئی جی اسلام آباد کی ذمہ داریاں سنبھالیں۔ انہوں نے پولیس کے سینئر افسران سے تعارفی ملاقاتیں کیں اور مختلف پیشہ ورانہ امور، امن و امان کی صورتحال، جرائم کی روک تھام، ٹریفک مینجمنٹ اور شہریوں کو فراہم کی جانے والی پولیس سروسز کے حوالے سے تفصیلی بریفنگ لی۔

نئے آئی جی اسلام آباد نے سنٹرل پولیس آفس کے اسٹاف سے بھی ملاقات کی اور مختلف انتظامی و پیشہ ورانہ امور پر گفتگو کی۔ اس موقع پر انہوں نے پولیس فورس کی پیشہ ورانہ صلاحیتوں کو مزید بہتر بنانے اور جدید تقاضوں سے ہم آہنگ پولیسنگ کے نظام کو فروغ دینے پر زور دیا۔

کیپٹن محمد سہیل چوہدری نے یادگارِ شہداء پر بھی حاضری دی، پھولوں کی چادر چڑھائی اور اسلام آباد پولیس کے شہداء کو خراج عقیدت پیش کیا۔ انہوں نے شہداء کے درجات کی بلندی کے لیے دعا بھی کی۔

اس موقع پر گفتگو کرتے ہوئے آئی جی اسلام آباد نے کہا کہ اسلام آباد میں امن و امان کا قیام اور شہریوں کا تحفظ اولین ترجیح ہے۔ شہریوں کو بروقت اور مؤثر پولیس سروسز کی فراہمی یقینی بنائی جائے گی جبکہ جرائم کی روک تھام اور شہریوں کے جان و مال کے تحفظ کے لیے مؤثر اقدامات کیے جائیں گے۔

انہوں نے واضح کیا کہ میرٹ، شفافیت اور قانون کی بالادستی پر کوئی سمجھوتہ نہیں ہوگا۔ اسلام آباد پولیس کی پیشہ ورانہ استعداد میں مزید اضافہ کیا جائے گا اور پولیسنگ کے نظام میں جدید ٹیکنالوجی کے مؤثر استعمال کو فروغ دیا جائے گا۔
آئی جی اسلام آباد نے کہا کہ ٹریفک مینجمنٹ اور عوامی سہولیات میں مزید بہتری لائی جائے گی جبکہ پولیس افسران اور جوان شہریوں کے ساتھ خوش اخلاقی، ذمہ داری اور پیشہ ورانہ رویے کا مظاہرہ کریں۔ عوام اور پولیس کے درمیان اعتماد کو مزید مضبوط بنانا بھی ترجیحات میں شامل ہے۔

انہوں نے پولیس فورس میں احتساب، نظم و ضبط اور پیشہ ورانہ معیار کو مزید مؤثر بنانے پر بھی زور دیا اور کہا کہ شہریوں کے تحفظ اور قانون کی عملداری کے لیے اسلام آباد پولیس پوری ذمہ داری اور عزم کے ساتھ اپنے فرائض سرانجام دے گی۔
کیپٹن محمد سہیل چوہدری نے کہا کہ شہداء کی قربانیوں کو ہمیشہ یاد رکھا جائے گا اور اسلام آباد پولیس ان کے مشن کو آگے بڑھائے گی۔