ایف آئی اے اسلام آباد زون میں سخت محکمانہ احتساب، 10 ملازمین برطرف، 8 کی تنزلی

اسلام آباد (صدائے سچ نیوز) فیڈرل انویسٹی گیشن ایجنسی اسلام آباد زون نے محکمانہ نظم و ضبط کی خلاف ورزیوں، غیر ذمہ دارانہ و غیر پیشہ ورانہ طرزِ عمل اور عوامی شکایات سے متعلق معاملات پر سخت کارروائی کرتے ہوئے مجموعی طور پر 76 محکمانہ سزائیں عائد کردی گئیں۔

ڈائریکٹر ایف آئی اے اسلام آباد زون کی زیرِ صدارت منعقدہ اردلی روم کے بعد سزاؤں کے متعلق میٹنگ کی جس میں افسران و اہلکاران کے خلاف مختلف محکمانہ معاملات کا جائزہ لیا گیا۔ متعلقہ افسران و اہلکاران کو ذاتی طور پر سنا گیا اور انہیں اپنا مؤقف پیش کرنے کا مکمل موقع فراہم کیا گیا۔

محکمانہ کارروائی کے دوران دستیاب ریکارڈ اور شواہد کا جائزہ لینے کے بعد سول سرونٹس (E&D) رولز 2020 کے تحت قواعد و ضوابط کے مطابق سزائیں عائد کی گئیں۔

محکمانہ سزاؤں کے تحت 10 ملازمین کو سرکاری ملازمت سے برطرف جبکہ 8 ملازمین کی عہدے میں تنزلی کی گئی۔

ملازمت سے برطرف کیے جانے والوں میں سب انسپکٹر حسن علی، اپر ڈویژن کلرک محمد سوبان، ہیڈ کانسٹیبل طاہر محمود، ہیڈ کانسٹیبل میلون مسیح، ہیڈ کانسٹیبل محمد بلال ولد محمد اختیار، کانسٹیبل طاہر صفیر، کانسٹیبل محمد احمد رضا، کانسٹیبل عاقب محمود، کانسٹیبل طاہر محمود اور اے ایس آئی مبشر کاظمی شامل ہیں۔

عہدے میں تنزلی پانے والوں میں محمد نیاز میر کو اسسٹنٹ سب انسپکٹر سے ہیڈ کانسٹیبل، محمد وسیم اقبال کو اسسٹنٹ سب انسپکٹر سے ہیڈ کانسٹیبل، شیراز منظور کو اپر ڈویژن کلرک سے لوئر ڈویژن کلرک جبکہ رضوان علی خان، مسعود احمد، مدثر علی، الماس الیاس اور قاسم محمود کو ہیڈ کانسٹیبل سے کانسٹیبل کے عہدے پر تنزلی کی سزا دی گئی۔

دیگر 58 محکمانہ سزاؤں میں 19 کیسز میں تین سال، 27 کیسز میں دو سال اور 5 کیسز میں ایک سال کے لیے ترقی روکنے کی سزائیں شامل ہیں۔ ایک کیس میں پے اسکیل میں تین مراحل کی کمی جبکہ 6 کیسز میں سرزنش کی سزا دی گئی۔

دوسری جانب اچھی کارکردگی کا مظاہرہ کرنے والے افسران کی حوصلہ افزائی بھی کی گئی۔ ڈائریکٹر ایف آئی اے اسلام آباد زون کی جانب سے بہترین کارکردگی پر 3 افسران کو Commendation Certificate Class-II (CC-II) سے نوازا گیا۔

اس موقع پر ڈائریکٹر ایف آئی اے اسلام آباد زون نے کہا کہ ادارے میں نظم و ضبط کی خلاف ورزی، بدعنوانی، اختیارات کے ناجائز استعمال، غیر ذمہ دارانہ اور غیر پیشہ ورانہ طرزِ عمل پر کسی قسم کا سمجھوتہ نہیں کیا جائے گا۔

انہوں نے کہا کہ محکمانہ کارروائی کے دوران تمام متعلقہ افسران و اہلکاران کو اپنا مؤقف پیش کرنے کا مکمل موقع فراہم کیا گیا جبکہ دستیاب ریکارڈ اور شواہد کی روشنی میں قواعد و ضوابط کے مطابق فیصلے کیے گئے۔

ڈائریکٹر ایف آئی اے اسلام آباد زون نے واضح کیا کہ اچھی کارکردگی کو بھرپور طور پر سراہا جائے گا، تاہم نظم و ضبط، دیانت داری اور پیشہ ورانہ ذمہ داریوں پر سمجھوتہ کرنے والے عناصر کے خلاف قواعد و ضوابط کے تحت سخت کارروائی جاری رکھی جائے گی۔