ایران جنگ نے ٹرمپ کی جماعت کو ڈبو دیا، انتخابی شکست کا اعتراف

واشنگٹن (صداۓ سچ نیوز) امریکی صدر ڈونلڈ ٹرمپ نے اعتراف کیا ہے کہ ایران کے خلاف جنگ نے وسط مدتی انتخابات میں ریپبلکن امیدواروں کی کامیابی کے امکانات متاثر کیے، تاہم انہوں نے تہران کے خلاف فوجی کارروائی کے فیصلے کا دفاع کرتے ہوئے اسے درست قرار دیا ہے۔

وال اسٹریٹ جرنل اور فاکس نیوز کو دیے گئے انٹرویوز میں ٹرمپ کا کہنا تھا کہ ایران جنگ انتخابی نتائج پر اثرانداز ہونے والے عوامل میں شامل تھی، لیکن انہیں اپنے فیصلے پر کوئی پچھتاوا نہیں۔ ان کے مطابق، وہ دوبارہ بھی یہی قدم اٹھائیں گے۔

انتخابی نتائج میں کئی روایتی ریپبلکن ریاستوں میں ڈیموکریٹ امیدواروں کی کامیابی نے حکمران جماعت کو دھچکا پہنچایا۔ ٹرمپ نے انتخابی شکست کی ذمہ داری پارٹی امیدواروں پر ڈالتے ہوئے کہا کہ وہ ووٹرز کو متحرک کرنے میں ناکام رہے، جبکہ ان کا مؤقف تھا کہ اگر وہ خود بیلٹ پر ہوتے تو ریپبلکنز بڑی کامیابی حاصل کرتے۔

دوسری جانب ایران جنگ کے باعث بڑھتے اخراجات، مہنگائی اور حکومتی پالیسیوں پر عوامی تحفظات کو بھی انتخابی نتائج پر اثرانداز ہونے والے عوامل قرار دیا جا رہا ہے۔

فاکس نیوز سے گفتگو میں ٹرمپ نے اپنی انتظامیہ کی معاشی کارکردگی کا دفاع کیا اور کہا کہ وہ انتخابی نتائج کو اپنے خلاف عوامی غصے کا اظہار نہیں سمجھتے۔

ادھر ریپبلکن پارٹی کے اندر ٹرمپ کی حمایت یافتہ امیدواروں کے انتخاب اور عوامی خدشات کو نظرانداز کرنے پر ناراضی بڑھ رہی ہے۔ انتخابی نتائج کے بعد کانگریس میں ڈیموکریٹس کی مضبوط پوزیشن ٹرمپ انتظامیہ کے لیے قانون سازی، بجٹ اور حکومتی تقرریوں کے معاملات میں مشکلات پیدا کر سکتی ہے۔