ایران کی یمن میں فضائی حملوں کی مذمت، سعودی عرب اور یمن کے درمیان مذاکرات کا مطالبہ

تہران (صداے سچ نیوز) ایران نے یمن میں شہری تنصیبات اور غیر فوجی علاقوں پر فضائی حملوں کی شدید مذمت کرتے ہوئے سعودی عرب اور یمن کے درمیان فوری مذاکرات کا مطالبہ کردیا۔

ایرانی وزارت خارجہ نے سوشل میڈیا پلیٹ فارم ایکس پر جاری بیان میں مطالبہ کیا کہ یمن میں فوجی حملے فوری طور پر روکے جائیں، ناکہ بندی مکمل طور پر ختم کی جائے اور یمنی عوام کے حقِ خودارادیت کا احترام کیا جائے۔

بیان میں تعز کی ایک عوامی مارکیٹ اور صنعاء گورنری کے مشرق میں واقع بنی حشیش ضلع کے گاؤں الشریعہ پر حالیہ مہلک حملوں کا خصوصی ذکر کرتے ہوئے انہیں جنگی جرائم قرار دیا گیا۔

ایرانی وزارت خارجہ کا کہنا تھا کہ سعودی عرب اور یمن کے درمیان تنازع کو جلد از جلد مذاکرات کے ذریعے ختم کیا جانا چاہیے، جس کے لیے دونوں فریقین کی باہمی رضامندی سے ایک لائحہ عمل طے کیا جائے۔

الجزیرہ کے مطابق تعز میں حملے کے بعد حوثیوں اور سعودی قیادت میں قائم اتحاد کی حمایت یافتہ یمن کی بین الاقوامی طور پر تسلیم شدہ حکومت نے ایک دوسرے کو حملے کا ذمہ دار ٹھہرایا ہے۔