امریکا ایرانی بندرگاہوں کا محاصرہ ترک کر دے، سعودی عرب

ریاض (صداۓ سچ نیوز) سعودی عرب نے امریکا پر زور دیا ہے کہ ایران کی بندرگاہوں کے محاصرے کا منصوبہ ترک کر دے۔

وال اسٹریٹ جرنل کی رپورٹ کے مطابق سعودی حکام نے امریکی انتظامیہ پر دباؤ ڈالا ہے کہ آبنائے ہرمز کی ناکہ بندی ختم کرے اور دوبارہ مذاکرات کی میز پر واپس آئے۔

یہ بھی پڑھیں:ایران کے جوہری پروگرام پر ڈیڈ لاک: امریکا 20 سالہ پابندی کا خواہاں، تہران 5 سال پر آمادہ

عرب حکام کے مطابق ریاض کو خدشہ ہے کہ اگر ایرانی بندرگاہوں کو بند کیا گیا تو تہران جوابی کارروائی کرتے ہوئے دیگر اہم بحری راستوں کو خطرے میں ڈال سکتا ہے، یہ اقدام خطے میں کشیدگی کو مزید بڑھا سکتا ہے۔

واضح رہے کہ امریکا کی جانب سے آبنائے ہرمز کے ذریعے ایران آنے جانے والی تمام بحری نقل و حمل کو روکنے کا مقصد ایران کی پہلے سے کمزور معیشت پر مزید دباؤ ڈالنا ہے۔

سعودی عرب نے خبردار کیا ہے کہ ایران اس کے جواب میں باب المندب کو بند کر سکتا ہے، جو بحیرۂ احمر میں ایک اہم گزرگاہ ہے اور سعودی عرب کے تیل کی برآمدات کے لیے نہایت اہم حیثیت رکھتی ہے۔