بینک آف پنجاب کا بڑا فیصلہ: ظفر مسعود ایک سال مزید سی ای او برقرار

لاہور(صدائے سچ نیوز) بینک آف پنجاب کے بورڈ آف ڈائریکٹرز نے ظفر مسعودکے بطور صدر اور چیف ایگزیکٹو آفیسر تعیناتی میں ایک سال کی توسیع کی منظوری دے دی ہے۔ یہ بات پاکستان اسٹاک ایکسچینج کو بھیجے گئے نوٹس میں بتائی گئی ہے۔

تفصیلات کے مطابق یہ فیصلہ 13 اپریل 2026 کو منعقد ہونے والے بورڈ کے 330ویں ہنگامی اجلاس میں کیا گیا۔ جاری کردہ اعلامیے کے مطابق، یہ توسیع 16 اپریل 2026 سے نافذ العمل ہوگی اور موجودہ شرائط و ضوابط کے تحت جاری رہے گی۔

بینک کے مطابق، اس منظوری سے قبل حکومت پنجاب کے محکمہ خزانہ کی جانب سے 13 اپریل 2026 کو باضابطہ نوٹیفکیشن جاری کیا گیا تھا۔

اپنی فائلنگ میں بینک آف پنجاب نے بتایا کہ بورڈ نے معاہدے کو موجودہ شرائط کے ساتھ مزید ایک سال کے لیے جاری رکھنے کی منظوری دی ہے۔

اس پیش رفت سے پاکستان اسٹاک ایکسچینج کو بھی باضابطہ طور پر آگاہ کر دیا گیا ہے تاکہ ٹی آر ای سرٹیفیکیٹ ہولڈرز اور مارکیٹ کے دیگر شرکاء تک معلومات پہنچائی جا سکیں۔

بینک آف پنجاب کی ویب سائٹ کے مطابق، ظفر مسعود 2020 سے بطور سی ای او خدمات انجام دے رہے ہیں۔ وہ ایک تجربہ کار بینکر اور کاروباری شخصیت ہیں جنہیں 27 سال سے زائد کا تجربہ حاصل ہے۔ وہ اس سے قبل بارکلے بینک، سٹی بینک، دبئی اسلامی بینک اور امیرکن ایکسپریس بینک جیسے اداروں میں اہم عہدوں پر خدمات انجام دے چکے ہیں۔ انہیں ڈیولپمنٹ فنانس، بینکنگ ٹرانسفارمیشن اور پبلک سیکٹر مالیاتی اداروں میں وسیع مہارت حاصل ہے۔