پٹرولیم کمیٹی کا اجلاس، گورننس، تقرریوں اور توانائی صورتحال کا جائزہ

اسلام آباد (صداۓ سچ نیوز) ایوانِ بالا کی قائمہ کمیٹی برائے پٹرولیم کی ذیلی کمیٹی کا اجلاس پارلیمنٹ لاجز میں کنوینئر کمیٹی سینیٹر منظور احمد کاکڑ کی زیر صدارت منعقد ہوا۔ اجلاس میں رکن کمیٹی سینیٹر رانا محمود الحسن، اسپیشل سیکرٹری وزارتِ توانائی اور دیگر اعلیٰ حکام نے شرکت کی۔

اجلاس میں بورڈ تقرریوں سے متعلق قانونی و ضابطہ جاتی فریم ورک کا تفصیلی جائزہ لیا گیا، جس کا مقصد طرزِ حکمرانی (گورننس) میں موجود خامیوں کی نشاندہی اور ان کے تدارک کے لیے مؤثر اصلاحی اقدامات کی سفارشات مرتب کرنا تھا۔

ذیلی کمیٹی نے مختلف سرکاری و نیم سرکاری اداروں، جن میں پاکستان پٹرولیم لمیٹڈ، آئل اینڈ گیس ڈیولپمنٹ کمپنی لمیٹڈ، سینڈک میٹلز لمیٹڈ، پاکستان ایل این جی لمیٹڈ، سوئی سدرن گیس کمپنی لمیٹڈ، پاکستان اسٹیٹ آئل کمپنی لمیٹڈ، گورنمنٹ ہولڈنگز (پرائیویٹ) لمیٹڈ، انٹر اسٹیٹ گیس سسٹمز لمیٹڈ، پاکستان منرل ڈیولپمنٹ کارپوریشن، سوئی ناردرن گیس پائپ لائنز لمیٹڈ اور پاک عرب ریفائنری لمیٹڈ کے بورڈز کی تشکیل کے طریقہ کار کا تفصیل سے جائزہ لیا۔

یہ بھی پڑھیں:  آسٹریلیا کی سب سے بڑی آئل ریفائنری میں آگ پر 12 گھنٹے بعد قابو پالیا گیا

اجلاس کو بریفنگ دیتے ہوئے اسپیشل سیکرٹری وزارتِ توانائی (پاور ڈویژن) نے آگاہ کیا کہ پاکستان پٹرولیم لمیٹڈ کے بورڈ کے لیے متعدد ناموں میں سے سات امیدواروں کو شارٹ لسٹ کیا گیا تھا۔ اس موقع پر کنوینئر کمیٹی سینیٹر منظور احمد کاکڑ نے نشاندہی کی کہ بعض نام ایسے بھی شامل ہیں جن کے خلاف ای سی ایل میں اندراج رہا ہے، بعض افراد ایک سے زائد بورڈز میں تعینات ہیں اور ان کے خلاف آڈٹ اعتراضات بھی سامنے آئے ہیں۔ انہوں نے زور دیا کہ تقرریاں صرف میرٹ پر کی جائیں تاکہ باصلاحیت اور دیانتدار افراد ملک و قوم کی بہتری کے لیے خدمات انجام دے سکیں۔

اسپیشل سیکرٹری نے مزید بتایا کہ ایک افسر کے خلاف داخلی انکوائری کے بعد اسے شارٹ لسٹ سے خارج کر دیا گیا ہے۔ انہوں نے واضح کیا کہ کمپنیز ایکٹ کے نفاذ سے قبل ایم ڈی اور سی ای او کی تقرری حکومت کرتی تھی، تاہم اب یہ اختیار بورڈ آف ڈائریکٹرز کو حاصل ہے اور تمام اقدامات قانونی فریم ورک کے مطابق کیے جا رہے ہیں۔

ذیلی کمیٹی نے متفقہ طور پر سفارش کی کہ سرکاری اداروں (SOEs) ایکٹ 2023 کی متعلقہ شقوں میں ترمیم کی جائے تاکہ ایم ڈی اور سی ای او کی تقرری کا اختیار آئین کے آرٹیکل 90، 91 اور 99 کے مطابق وفاقی حکومت کو واپس دیا جا سکے، جبکہ بورڈ آف ڈائریکٹرز کا مشاورتی کردار برقرار رکھا جائے۔ مزید برآں، کمیٹی نے کارکردگی کے جائزے کے لیے ایک شفاف اور منظم نظام وضع کرنے کی سفارش کی، جس میں متعلقہ وزارت یا ڈویژن کی مؤثر شمولیت یقینی بنائی جائے تاکہ جوابدہی، نگرانی اور قومی پالیسی سے ہم آہنگی برقرار رہے۔

یہ بھی پڑھیں: تیل کی عالمی سیاست میں امریکا اور چین آمنے سامنے

اجلاس کے دوران ملک میں پٹرولیم مصنوعات کی موجودہ صورتحال پر بھی تفصیلی بریفنگ دی گئی۔ اسپیشل سیکرٹری وزارتِ توانائی نے بتایا کہ پاکستان کی تقریباً 90 فیصد پٹرولیم سپلائی خلیجی ممالک سے آبنائے ہرمز کے ذریعے آتی ہے، اور ترسیلی جہاز عموماً آٹھ دن میں پاکستان پہنچ جاتا ہے۔ اگر آبنائے ہرمز بند ہو جائے تو متبادل راستوں پر غور کرنا ہوگا۔ انہوں نے بتایا کہ بھارت کی تقریباً 60 فیصد، چین کی 45 فیصد جبکہ جاپان کی 80 سے 90 فیصد تیل کی ترسیل بھی اسی راستے سے ہوتی ہے۔ پاکستان کے پاس اس وقت تقریباً ایک ماہ کی پٹرولیم مصنوعات کا ذخیرہ موجود ہے، جبکہ گزشتہ سال کے مقابلے میں رواں سال تیل کی کھپت میں اضافہ ہوا ہے۔

گیس کی صورتحال پر بریفنگ دیتے ہوئے بتایا گیا کہ قطر سے درآمد شدہ گیس دستیاب ہے، تاہم وہاں کی دو بڑی ریفائنریوں پر حملوں کے باعث مکمل سپلائی کی بحالی میں کچھ وقت درکار ہوگا۔ کمیٹی کو مزید آگاہ کیا گیا کہ ملک میں تیل و گیس کی تلاش کا عمل جاری ہے اور ٹل بلاک میں گیس کے بڑے ذخائر دریافت ہوئے ہیں۔

ایل پی جی کے حوالے سے بتایا گیا کہ تقریباً 50 فیصد ایل پی جی ایران سے درآمد کی جاتی ہے، 15 فیصد دیگر ممالک سے جبکہ باقی مقامی پیداوار سے حاصل ہوتی ہے۔ مزید یہ کہ ملک میں جہاں بھی تیل کے ذخائر دریافت ہوتے ہیں، ابتدائی طور پر ایل پی جی ہی حاصل ہوتی ہے۔

اجلاس کے اختتام پر کنوینئر کمیٹی سینیٹر منظور احمد کاکڑ نے شفافیت، میرٹ اور مؤثر نگرانی کے نظام کو یقینی بنانے پر زور دیا تاکہ قومی وسائل کا بہتر اور ذمہ دارانہ استعمال ممکن بنایا جا سکے۔