اسرائیل اور حماس کے درمیان جنگ بندی برقرار، فلسطینیوں کی شمالی غزہ میں واپسی جاری

غزہ (صدائے سچ نیوز) غزہ کے شمالی حصے میں فلسطینیوں کی واپسی کا سلسلہ جاری ہے، جب کہ اسرائیل اور حماس کے درمیان جنگ بندی برقرار ہے۔

قطری نشریاتی ادارے ’الجزیرہ‘ کے مطابق ہزاروں جبراً بے گھر کیے گئے فلسطینی شمالی غزہ کے تباہ شدہ شہروں اور قصبوں کی جانب واپس جا رہے ہیں، اسرائیلی فوج نے جنگ بندی کرتے ہوئے علاقے سے جزوی انخلا شروع کر دیا ہے، یہ اقدام اسرائیل اور حماس کے درمیان امن معاہدے کے پہلے مرحلے کا حصہ ہے۔

یہ بھی پڑھیں: مطالبات پورے نہ ہوئے تو جنگ دوبارہ شروع کردیں گے: نیتن یاہو کی دھمکی

امریکی صدر ڈونلڈ ٹرمپ نے کہا ہے کہ غزہ میں زیرِ حراست اسرائیلی قیدیوں کی رہائی پیر کو متوقع ہے۔

حماس، فلسطینی اسلامی جہاد (پی آئی جے) اور عوامی محاذ برائے آزادیِ فلسطین (پی ایف ایل ایف) نے کہا ہے کہ وہ غزہ کی پٹی پر کسی بھی غیر ملکی سرپرستی کو مسترد کرتے ہیں۔

غزہ کے حکام نے جنگ کے دوران اسرائیل کی جانب سے کیے گئے مبینہ جنگی جرائم اور نسل کشی کی آزاد بین الاقوامی تحقیقات کا مطالبہ کیا ہے۔