سعد ایدھی اسرائیلی قید سے رہائی کے بعد وطن پہنچ گئے

کراچی (صداۓ سچ نیوز) ایدھی فاؤنڈیشن کے سربراہ فیصل ایدھی کے بیٹے سعد ایدھی اسرائیلی قید سے رہائی کےبعد وطن واپس پہنچ گئے ہیں۔

وہ اسرائیلی قید سے رہائی کے بعد ترکیہ سے براستہ شارجہ کراچی پہنچے، ایئر پورٹ پر فیصل ایدھی، سعد ایدھی کی اہلیہ، ان کی کمسن بیٹی اور دیگر شہریوں نے ان کا استقبال کیا۔

استقبال کرنے والوں میں سابق سینیٹر مشتاق احمد بھی شامل تھے، سعد ایدھی غزہ امداد لے جانے والے بحری امدادی قافلے صمود فلوٹیلا میں شامل تھے۔

سعد ایدھی غزہ کا محاصرہ توڑنے کی کوشش کرنے والے بین الاقوامی مشن کا حصہ تھے۔

ایئرپورٹ پر جیو نیوز سے گفتگو میں سعد ایدھی نے کہا کہ غزہ کےلیے ہمارا مشن غیرمسلح اور انسانی امداد کےلیے تھا، ہم غزہ میں بھوک کے شکار مظلوم عوام اور بچوں کو خوراک اور ادویات پہنچانا چاہتے تھے۔

انہوں نے مزید کہا کہ ہمیں اسرائیلی فوج نے بین الاقوامی سمندر میں غیرقانونی طور پر گرفتار کیا، ہمیں 4 دن تک قید میں رکھ کر غیرانسانی سلوک کا نشانہ بنایا گیا۔

سعد ایدھی نے یہ بھی کہا کہ اسرائیلی ہم پر لیزر لائٹیں مارتے تھے اور قید خانے کے فرش پر پانی ڈال دیا جاتا تھا کہ ہم سو نہ سکیں۔

اُن کا کہنا تھا کہ ہمیں تین تین چار چار گھنٹے تک گٹھنوں کے بل بٹھا کر مارتے تھے، جن لوگوں کے پاسپورٹ امریکا یا یورپ کے نہیں تھے، ان پر خاص طور زیادہ تشدد ہوتا تھا۔

یہ بھی پڑھیں: فرانس نے انتہا پسند اسرائیلی وزیر اتمر بن گویر کے فرانسیسی سرزمین میں داخلے پر پابندی عائد کردی

سعد ایدھی نے کہا کہ جو امریکی اپنی حکومت کے خلاف بولتے تھے، ان پر بھی زیادہ تشدد کرتے تھے، ہم پر 4 دن تشدد ہوا، فلسطینی 80 سال سے یہ ظلم برداشت کر رہےہیں، انہیں سیلوٹ ہے۔

اس موقع پر سابق سینیٹر مشتاق احمد نے کہا کہ اسرائیل فلسطینیوں کی نسل کشی کر رہا ہے، فلسطینیوں پر اسرائیل نے بھوک مسلط کر رکھی ہے، نیتن یاہو اور اسرائیلی فوج بےبی کلر ہیں۔