پنجاب ورکرز ویلفیئر فنڈ کی مزدوروں کو ایک ارب 70 کروڑ روپے سے زائد مالی معاونت، تمام ادائیگیاں براہِ راست بینک اکاؤنٹس میں منتقل

اسلام آباد (صدائے سچ نیوز) پنجاب ورکرز ویلفیئر فنڈ نے رواں مالی سال کے دوران 22 اکتوبر 2026 تک صوبے کے صنعتی محنت کشوں کو 8 ہزار 915 کیسز میں مجموعی طور پر ایک ارب 70 کروڑ 43 لاکھ 87 ہزار 658 روپے کی مالی معاونت فراہم کی ہے۔ یہ ادائیگیاں ٹیلنٹ اسکالرشپ، میرج گرانٹ اور ڈیتھ گرانٹ کی مد میں کی گئی ہیں۔

پنجاب ورکرز ویلفیئر فنڈ، محکمہ محنت و انسانی وسائل حکومت پنجاب کے ترجمان کے مطابق یکم جولائی سے 22 اکتوبر 2026 تک مستحق مزدوروں کو فراہم کی جانے والی تمام مالی امداد بغیر کسی واسطے کے ان کے ذاتی بینک اکاؤنٹس میں براہِ راست منتقل کی گئی ہے۔

ترجمان کے مطابق مالی معاونت کی مد میں ٹیلنٹ اسکالرشپ کے تحت 5 ہزار 536 کیسز میں 51 کروڑ 1 لاکھ 57 ہزار 658 روپے، میرج گرانٹ کے تحت 3 ہزار 61 کیسز میں ایک ارب 1 کروڑ 21 لاکھ 30 ہزار روپے، جبکہ ڈیتھ گرانٹ کے تحت 318 کیسز میں 18 کروڑ 21 لاکھ روپے ادا کیے گئے۔

ترجمان نے بتایا کہ وزیراعلیٰ پنجاب مریم نواز شریف کی ہدایات پر مالی معاونت کی ادائیگیوں میں مڈل مین کلچر کے خاتمے اور شفافیت کو یقینی بنانے کے لیے اقدامات کیے گئے ہیں، جس کے تحت مستحق صنعتی محنت کشوں کو ان کی مالی امداد براہِ راست بینک اکاؤنٹس میں فراہم کی جا رہی ہے۔

پنجاب ورکرز ویلفیئر فنڈ کے مطابق ادارہ صنعتی محنت کشوں اور ان کے اہلِ خانہ کی فلاح و بہبود کے لیے مالی معاونت کی فراہمی اور ادائیگیوں کے نظام کو مزید شفاف بنانے کے لیے پرعزم ہے۔