وزیرِاعظم شہباز شریف کا ایرانی سپریم لیڈر شہید آیت اللّٰہ سید علی خامنہ ای کو خراجِ تحسین

تہران (صداۓ سچ نیوز) وزیرِ اعظم شہبازشریف نے ایرانی سپریم لیڈر شہید آیت اللّٰہ سید علی خامنہ ای کو خراجِ تحسین پیش کیا ہے۔

سوشل میڈیا پلیٹ فارم ایکس پر جاری کیے گئے بیان میں انہوں نے کہا ہے کہ شہید آیت اللّٰہ علی خامنہ ای کے تعزیتی اجتماع میں شرکت کی۔

وزیرِ اعظم شہباز شریف نے کہا ہے کہ اسلامی جمہوریہ ایران کے شہید رہبرِ معظم آیت اللّٰہ سید علی خامنہ ای کی نمازِ جنازہ اور الوداعی تقریب کے موقع پر حکومت اور پاکستان کے عوام کی جانب سے ایران کی حکومت اور برادر عوام سے تعزیت، گہرے دکھ اور افسوس کا اظہار کیا۔

انہوں نے کہا ہے کہ مرحوم رہبرِ معظم کی حکمت و دانشمندی، قیادت اور ایران سمیت خطے پر ان کے گہرے اثرات کو نسلوں تک یاد رکھا جائے گا۔

وزیرِ اعظم کا کہنا ہے کہ ایرانی عوام کے ساتھ یکجہتی کے اظہار کے لیے میرے ہمراہ ایک اعلیٰ سطح کا وفد بھی تھا جس میں چیف آف ڈیفنس فورسز اور آرمی چیف فیلڈ مارشل سید عاصم منیر، نائب وزیرِ اعظم اسحاق ڈار، سینئر پارلیمنٹیرینز، چیئرمین پاکستان پیپلز پارٹی بلاول بھٹو زرداری اور اسپیکر قومی اسمبلی سردار ایاز صادق کے ساتھ ساتھ سینئر وزراء اور سرکاری حکام شامل تھے۔

شہباز شریف کا یہ بھی کہنا ہے کہ ایک برادر ہمسایہ ملک کے طور پر پاکستان دکھ کی اس گھڑی میں ایران کے ساتھ کھڑا ہے۔

واضح رہے کہ وزیرِاعظم شہباز شریف ایران کے دورے کے بعد ترکیہ پہنچ گئے، وہ ترک صدر رجب طیب اردوان کی دعوت پر استنبول گئے ہیں۔