کراچی ایئرپورٹ پر سعودی عرب جانے والے مسافروں کی ویکسینیشن سروس معطل

کراچی (صداۓ سچ نیوز) کراچی ایئرپورٹ پر سعودی عرب جانے والے مسافروں کے لیے ویکسینیشن کی سہولت متاثر ہوگئی، بارڈر ہیلتھ سروسز کا ہنگامی ویکسینیشن کاؤنٹر ہٹائے جانے کے بعد مسافروں کو مشکلات کا سامنا ہے۔

دستیاب معلومات کے مطابق ویکسین کی صرف 4 ہزار خوراکیں باقی رہ گئی ہیں، جنہیں صرف ان مسافروں کے لیے مختص کیا گیا ہے جنہوں نے مطلوبہ فیس پہلے سے جمع کرادی ہے۔

کراچی ایئرپورٹ پر ہنگامی بنیادوں پر ویکسین لگانے کے لیے قائم بارڈر ہیلتھ سروسز کا کاؤنٹر ختم کردیا گیا ہے، جبکہ ایئرپورٹ ڈسپنسری کے عملے کو بھی ڈیوٹی سے فارغ کردیا گیا ہے۔

ذرائع کے مطابق اب ڈسپنسری میں صرف ایک ڈسپنسر اور ایک اہلکار موجود ہے، جبکہ ویکسینیشن پروگرام کے تحت کام کرنے والے یومیہ اجرت کے ملازمین کو بھی اگلے احکامات تک ڈیوٹی پر نہ آنے کی ہدایت کی گئی ہے۔

ویکسینیشن سروسز جزوی طور پر معطل ہونے کے باوجود ایئرپورٹ ڈسپنسری میں ان مسافروں کو ویکسین لگانے کا عمل جاری ہے جنہوں نے پہلے ہی فیس جمع کرادی ہے۔

ویکسین کی باقی 4 ہزار خوراکیں بھی انہی مسافروں کے لیے مختص کی گئی ہیں، جس کے باعث تاحال فیس جمع نہ کرانے والے مسافروں کو ویکسین کے حصول میں مشکلات پیش آسکتی ہیں۔

سعودی عرب جانے والے مسافروں کے لیے لازمی ویکسینیشن مکمل کرنے کی آخری تاریخ میں 20 نومبر تک توسیع کردی گئی ہے تاکہ مسافروں کو مطلوبہ شرائط پوری کرنے کے لیے مزید وقت مل سکے۔

تاہم کراچی ایئرپورٹ پر ویکسین کی محدود دستیابی، عملے کی کمی اور ہنگامی ویکسینیشن کاؤنٹر کی بندش کے باعث سعودی عرب جانے والے مسافروں کو مشکلات کا خدشہ ہے۔