نواز شریف کا وزیراعظم آزاد کشمیر بننے کی خواہش کا اظہار

مظفر آباد (صداۓ سچ نیوز) پاکستان مسلم لیگ (ن) کے قائد نواز شریف نے آزاد جموں کشمیر کا وزیراعظم بننے کی خواہش کا اظہار کردیا۔ 

مظفر آباد میں انتخابی جلسے سے خطاب کرتے ہوئے سابق وزیراعظم پاکستان نواز شریف کا کہنا تھا کہ آزاد کشمیر میرا دوسرا گھر ہے، میرے لیے آزاد کشمیر بھی اتنا ہی عزیز ہے جتنا پنجاب ہے۔

انہوں نے کہا کہ میرا دل کرتا ہے کہ الیکشن میں کامیابی ملتی ہے تو شہباز شریف کو کہوں کہ مجھے وزیراعظم آزاد کشمیر بنادیں۔

نواز شریف کا کہنا تھا کہ مسلم لیگ (ن) کو کامیاب کروائیں گے تو ہر تیسرے ماہ خود یہاں آکر کام کا جائزہ لوں گا۔ ن لیگ کی حکومت بنتی ہے تو آزاد کشمیر کے تمام مسائل دور کرکے دم لیں گے۔

انہوں نے کہا کہ پنجاب کی طرح آزاد کشمیر بھی اتنا ہی عزیز ہے۔ آزاد کشمیر، جی بی اور چاروں صوبوں میں ترقیاتی منصوبوں میں تفریق نہیں کی۔

سابق وزیراعظم کا کہنا تھا کہ پنجاب کے منصوبوں کا آغاز شہباز شریف نے کیا، مریم اس کی تکمیل کر رہی ہیں۔ پنجاب میں جو ترقیاتی کام ہو رہا ہے اس میں شہباز شریف کا بھی بڑا کردار ہے۔

انہوں نے کہا کہ مریم کو کہا کہ جو پنجاب میں کر رہی ہو ویسا ہی کام مظفرآباد آزاد کشمیر میں ہوناچاہیے۔ آزاد کشمیر کے الیکشن میں کامیابی پر ایک ایک منصوبہ یہاں لے کر آئیں گے۔

نواز شریف کا کہنا تھا کہ پنجاب جیسے منصوبے آزاد کشمیر میں بھی بنیں گے، آزاد کشمیر میں بھی موٹروے جیسے منصوبے بنائے جائیں گے۔ دریائے جہلم کے ساتھ ساتھ خوبصورت موٹروے بننی چاہیے۔

انہوں نے یہ بھی کہا کہ جب میں وزیراعظم پاکستان تھا تو آزاد کشمیر کا بجٹ ڈبل کردیا تھا، اب ہماری حکومت یہاں بنی تو کشمیر کا بجٹ دس گنا بڑھائیں گے۔

قائد ن لیگ کا کہنا تھا کہ مظفر آباد کے لیے 10 گرین بسیں چند دنوں میں یہاں پہنچ جائیں گی، گرین بسیں چند دنوں میں مظفرآباد میں چلتی ہوئی نظر آئیں گی۔ آزاد کشمیر کے لیے 15 موبائل اسپتال بھی لے کر آ رہے ہیں۔

ان کا مزید کہنا تھا کہ ہم آئیں گے تو پچھلی ساری کسر نکالیں گے۔ آپ کو معلوم ہے کہ نواز شریف جو وعدہ کرتا ہے وہ پورا کرتا ہے۔

نواز شریف نے کہا کہ یہ سارے تحفے ابتدا ہیں ابھی نہیں معلوم کہ الیکشن کون جیتتا ہے۔