افواج پاکستان مضبوط اور فیصلہ کن ردعمل کے ذریعے غیر ملکی پراکیسز کے عزائم کو شکست دیں گی، فیلڈ مارشل

اسلام آباد (صداۓ سچ نیوز) فیلڈ مارشل سید عاصم منیر نے جی ایچ کیو میں 20 ویں نیشنل ورکشاپ میں بلوچستان کے شرکا سے خطاب کرتے ہوئے کہا کہ عوام کی مستقل حمایت سے بلوچستان میں دیرپا امن قائم ہوگا  جس کیلئے سیکیورٹی فورسز اور قانون نافذ کرنے والے اداروں کی مسلسل کوششیں جاری ہیں۔

آئی ایس پی آر کے مطابق فیلڈ مارشل نے ملک  سے دہشتگردی اور اس کے حامیوں کے مکمل خاتمے کے عزم کا اعادہ کیا اور کہا کہ فتنہ الخوارج اور فتنہ الہندوستان کیخلاف ٹارگٹڈ آپریشنز پورے عزم کے ساتھ جاری رہیں گے۔

فیلڈ مارشل عاصم منیر نے دہشت گردی کے بنیادی ڈھانچے کو ختم کرنے کے پاکستان کے پختہ عزم کا اعادہ کیا ۔

انہوں نے کہا کہ پاکستان اور عوام کیلئے خطرہ بننے والے دہشت گردوں کے بنیادی ڈھانچے کو ختم کریں گے، غیرملکی اسپانسرڈ پراکسیز نے بلوچستان میں امن کو خراب کرنے کی کوشش کی اور ان پراکسیز نے تشدد کو مسلسل ہوا دینے،استحکام کونقصان پہنچانے کی بھی کوشش کی  لیکن افواج پاکستان مضبوط اورفیصلہ کن ردعمل کے ذریعے غیرملکی پراکسیز کے عزائم کو شکست دیں گی۔

سید عاصم منیر کا کہناتھا کہ بلوچستان پاکستان کا فخر ہے، جو قدرتی دولت سے مالا مال ہے ،اللہ نے بلوچستان کو محب وطن لوگوں سے نوازا ، جوصوبے کی سب سےبڑی طاقت ہیں۔

فیلڈ مارشل نے بلوچستان میں وفاقی اور صوبائی حکومتوں کے جاری ترقیاتی اقدامات پر بھی روشنی ڈالی  اور کہا کہ ان منصوبوں کا مقصد عوامی نقطہ نظر کےذریعے بلوچستان کےسماجی و اقتصادی منظر نامے بدلنا ہے۔

سپہ سالار نے ملک کے مستقبل کی سمت ترتیب دینے کیلئے قومی اتحاد اور استقامت کی ضرورت پر زور  دیا، شرکا کی جانب سے پاکستان کے استحکام، ترقی اور خودمختاری کے لئے اپنے مشترکہ عزم کا اعادہ کیا گیا ۔