پیر مہر علی شاہؒ اور پیر سید نصیر الدین نصیرؒ نے ہمیشہ توحید، رسالت، محبت، امن اور اخوت کا درس دیا، پیر سید غلام شمس الدین گیلانی

لوٹن (یاسر مغل سے) حضرت پیر مہر علی شاہؒ اور حضرت پیر سید نصیر الدین نصیرؒ نے ہمیشہ توحید، رسالت، محبت، امن اور اخوت کا درس دیا، اور یہی ہماری خانقاہ کی بنیادی پہچان ہے کہ ہم لوگوں کو اتباعِ رسولِ اکرم ﷺ، بندگیِ رب، تزکیۂ نفس اور اللہ تعالیٰ سے مضبوط تعلق کی طرف راغب کرتے ہیں۔ جب انسان کا اپنے رب سے تعلق مضبوط ہوتا ہے تو اس کے دل میں امن و آشتی اور ذہن میں سکون پیدا ہوتا ہے، اور یہی تصوف کی حقیقی روح ہے۔

ان خیالات کا اظہار پیر سید غلام شمس الدین شمس گیلانی (گولڑہ شریف) نے بیڈفورڈ میں منعقدہ روحانی و فکری اجتماع "بزمِ نصیر” سے خطاب کرتے ہوئے کیا۔ انہوں نے کہا کہ اولیائے کرام کی تعلیمات انسان کو اللہ تعالیٰ کی بندگی، سنتِ رسولِ اکرم ﷺ کی پیروی اور انسانیت کی خدمت کا درس دیتی ہیں۔

انہوں نے اس بات پر زور دیا کہ درِ زہراؓ سے مضبوط تعلق قائم کیا جائے، سیدنا امامِ عالی مقام حضرت امام حسینؓ کے پیغامِ حق، صبر، استقامت اور قربانی کو سمجھا جائے، اسے اپنی زندگیوں میں اپنایا جائے اور معاشرے میں عام کرنے کے لیے عملی کردار ادا کیا جائے۔محفل سے علامہ برکات یمین الدین احمد اور پیر سید اسد شاہ گیلانی نے بھی خطاب کیا اور کہا کہ موجودہ دور میں اولیائے کرام کی تعلیمات، محبتِ اہلِ بیتِ اطہارؓ، اتباعِ سنتِ نبوی ﷺ اور اتحادِ امت کے پیغام کو عام کرنا وقت کی اہم ضرورت ہے۔

تقریب میں پیر محمد یوسف محی الدین، محمد یاسین (رکن برطانوی پارلیمنٹ)، کونسلر مسعود، کونسلر محمد دین، محمد تاج بٹ سمیت مذہبی، سماجی اور سیاسی شخصیات، مختلف مکاتبِ فکر کے نمائندوں اور عاشقانِ رسول ﷺ کی بڑی تعداد نے شرکت کی۔محفل میں ذکرِ الٰہی، نعتِ رسولِ مقبول ﷺ اور خصوصی دعا کا بھی اہتمام کیا گیا۔

تقریب کی نقابت علامہ محمد رزاق، خطیب مسجد گلشنِ بغداد، نے کی جبکہ چوہدری محسن نصیروی نے میزبان کی حیثیت سے شرکاء اور معزز مہمانوں کا خیرمقدم کیا۔ اختتام پر امتِ مسلمہ، پاکستان، آزاد کشمیر، برطانیہ اور پوری دنیا میں امن، استحکام، اتحادِ امت اور انسانیت کی فلاح کے لیے خصوصی دعائیں کی گئیں۔