لوٹن میں برٹش پاکستانی کمیونٹی کا جشنِ آزادی، ثقافتی رنگوں سے سجی پروقار تقریب

لوٹن (صداۓ سچ نیوز) برٹش پاکستانی ویلفیئر ایسوسی ایشن (BPWA) کے زیرِ اہتمام جشنِ آزادی پاکستان کو کلچرل ڈے کے طور پر منایا گیا۔ تقریب میں لارڈ لیفٹیننٹ، ڈپٹی لیفٹیننٹس، ممبر برطانوی پارلیمنٹ محمد یاسین، پاکستانی ہائی کمیشن لندن کی اہم شخصیات، کونسلرز اور دیگر ڈگنیٹریز سمیت برٹش پاکستانی کمیونٹی کی بڑی تعداد نے شرکت کی۔

تقریب میں پاکستان کے قومی پرچم کے ساتھ ساتھ پاکستانی ثقافت کو بھی اجاگر کیا گیا۔ بچوں اور نوجوانوں نے قومی پرچم لہراتے ہوئے قومی ترانے کے دوران بھرپور جوش و جذبے کا اظہار کیا، جبکہ مختلف ثقافتی سرگرمیوں نے تقریب کو مزید یادگار بنا دیا۔

اس موقع پر BPWA کے چیئرمین صوفی جاوید اختر، وائس چیئرمین راجہ ندیم اور جنرل سیکرٹری کونسلر منصور نے کہا کہ جشنِ آزادی محض ایک قومی دن نہیں بلکہ پاکستان سے محبت، اپنی شناخت اور ثقافتی ورثے سے وابستگی کے اظہار کا موقع ہے۔ بیرونِ ملک مقیم پاکستانیوں بالخصوص نئی نسل کو اپنی ثقافت اور قومی اقدار سے جوڑے رکھنا ہم سب کی مشترکہ ذمہ داری ہے۔

انہوں نے کہا کہ برٹش پاکستانی کمیونٹی نہ صرف پاکستان کی خوشیوں میں شریک ہوتی ہے بلکہ برطانیہ میں بھی اپنی ثقافت، روایات اور مثبت قومی تشخص کو اجاگر کرنے میں اہم کردار ادا کر رہی ہے۔ تقریب کا مقصد پاکستانی ثقافت کو نئی نسل تک منتقل کرنا اور مختلف کمیونٹیز کے درمیان باہمی ہم آہنگی کو فروغ دینا بھی تھا۔

تقریب کے اختتام پر پاکستان کی سلامتی، ترقی اور خوشحالی کے لیے خصوصی دعا کی گئی۔