روس کا یوکرین کی جانب سے آئل ریفائنری پر حملے کا دعویٰ، یوکرین نے الزام مسترد کردیا

ماسکو (صداۓ سچ نیوز) روس نے بدھ کے روز دعویٰ کیا ہے کہ یوکرینی ڈرونز نے اس کی 2 آئل ریفائنریز پر حملہ کر کے امریکی صدر ڈونلڈ ٹرمپ کی جانب سے اعلان کردہ ’توانائی جنگ بندی‘ کی صریح خلاف ورزی کی ہے، تاہم یوکرین نے روسی الزام کو جھوٹا دعویٰ قرار دے کر مسترد کر دیا ہے۔

توانائی کے امور کے لیے روس کے نائب وزیرِ اعظم الیگزینڈر نوواک نے بتایا کہ ’آج یوکرین کی جانب سے ساراٹوف اور ریازان کے علاقوں میں دو آئل ریفائنریز پر حملہ کیا گیا ہے‘۔ 

دوسری جانب یوکرینی صدر ولادیمیر زیلنسکی کے مشیر دیمیترو لیتوین نے اس دعوے کو جھوٹا قرار دیتے ہوئے وضاحت کی کہ دیگر مقامات پر حملے ضرور ہوئے ہیں ’لیکن ریفائنریز کو نشانہ نہیں بنایا گیا‘۔

روس کی جانب سے یہ الزام ایک ایسے وقت میں سامنے آیا ہے جب صدر ٹرمپ نے ماسکو پر ڈیزل کی برآمدات کے حوالے سے پابندیوں میں نرمی کے چند روز بعد اتوار کو یکطرفہ طور پر ’توانائی جنگ بندی‘ کا اعلان کیا تھا۔ 

غیر ملکی خبررساں ایجنسی کے مطابق روسی نائب وزیرِ اعظم کا کہنا تھا کہ ’ہم دیکھ رہے ہیں کہ یوکرینی فریق توانائی کی اس جنگ بندی کی جانب کوئی مثبت پیش رفت نہیں دکھا رہا‘۔