امریکیوں میں ڈیموکریٹس کی بڑھتی ہوئی مقبولیت، ٹرمپ کیلئے خطرے کی گھنٹی، رائڑز کا دعویٰ

واشنگٹن (صدائے سچ نیوز ڈیسک) امریکی صدر ڈونلڈ ٹرمپ کو مڈ ٹرم انتخابات سے قبل سیاسی مشکلات کا سامنا ہے، تازہ عوامی جائزوں میں ڈیموکریٹک پارٹی کو ری پبلکنز پر برتری حاصل ہونے کے اشاروں نے ٹرمپ انتظامیہ کے لیے خطرے کی گھنٹی بجا دی ہے۔

بین الاقوامی نشریاتی ادارے رائٹرز اور اِپسوس کے تازہ سروے کے مطابق کانگریس کے انتخابات میں ووٹ دینے کی ترجیح کے حوالے سے 46 فیصد رجسٹرڈ ووٹرز نے ڈیموکریٹس جبکہ 38 فیصد نے ری پبلکن پارٹی کی حمایت کی ہے۔ اس طرح ڈیموکریٹس کو آٹھ فیصد پوائنٹس کی برتری حاصل ہے۔

سروے میں صدر ڈونلڈ ٹرمپ کی مقبولیت کی شرح بھی صرف 32 فیصد ریکارڈ کی گئی، جو ان کے دورِ صدارت کی کم ترین سطح کے قریب ہے۔ یہ صورتحال ایسے وقت میں سامنے آئی ہے جب امریکی عوام 3 نومبر کو ہونے والے وسط مدتی انتخابات میں کانگریس کی آئندہ سیاسی سمت کا فیصلہ کر رہے ہیں۔

امریکی ووٹرز کے لیے مہنگائی اور روزمرہ اخراجات میں اضافہ اہم ترین انتخابی مسائل بن چکے ہیں۔ سروے کے مطابق 78 فیصد شرکاء نے اخراجاتِ زندگی کو اپنے ووٹ کے فیصلے میں انتہائی اہم یا بنیادی مسئلہ قرار دیا۔ معاشی معاملات پر بھی ڈیموکریٹس کو ری پبلکنز کے مقابلے میں زیادہ عوامی اعتماد حاصل ہے۔

سیاسی مبصرین کے مطابق یہ انتخابات محض کانگریس کی نشستوں کا مقابلہ نہیں بلکہ صدر ٹرمپ کی پالیسیوں اور طرزِ حکمرانی پر عوامی اعتماد کا امتحان بھی ہیں۔ اگر ڈیموکریٹس ایوانِ نمائندگان یا سینیٹ میں اکثریت حاصل کرنے میں کامیاب ہو گئے تو ٹرمپ انتظامیہ کے لیے قانون سازی اور حکومتی ایجنڈے پر عمل درآمد مشکل ہو سکتا ہے۔

اس وقت دونوں ایوانوں میں ری پبلکن پارٹی کو برتری حاصل ہے، تاہم ایوانِ نمائندگان میں اس کی اکثریت انتہائی معمولی ہے۔ ایسے میں چند نشستوں کا نتیجہ بھی واشنگٹن میں سیاسی طاقت کا توازن تبدیل کر سکتا ہے۔

تاہم قومی سطح پر ڈیموکریٹس کی برتری کو انتخابی کامیابی کی ضمانت قرار نہیں دیا جا سکتا، کیونکہ کانگریس کی نشستوں کا حتمی فیصلہ مختلف ریاستوں اور انتخابی حلقوں میں ہونے والے مقابلوں سے ہوگا۔

اس صورتحال پر امریکی ٹی وی چینل اسکائی نیوز کے امریکی امور کے نمائندے مارک اسٹون نے اپنے تجزیے میں تازہ عوامی جائزوں کا جائزہ لیتے ہوئے صدر ٹرمپ کو درپیش سیاسی چیلنجز اور ری پبلکن پارٹی کے لیے ممکنہ انتخابی نتائج کی نشاندہی کی ہے۔

مڈ ٹرم انتخابات کے نتائج صدر ٹرمپ کی دوسری صدارتی مدت کے لیے فیصلہ کن ثابت ہو سکتے ہیں اور امریکی سیاست میں طاقت کے موجودہ توازن کو تبدیل کرنے کی صلاحیت رکھتے ہیں۔