ڈیموکریٹس کی انتخابی کامیابی کے بعد اسرائیل کیلئے خطرے کی گھنٹی، امریکہ کے ساتھ تعلقات کو تین بڑے چیلنجز کا سامنا

واشنگٹن (صداۓ سچ نیوز) امریکی مڈ ٹرم انتخابات میں ریپبلکنز کی شکست اور ڈیموکریٹس کے کانگریس کے دونوں ایوانوں میں کنٹرول کے بعد اسرائیل کو امریکہ کے ساتھ تعلقات کے حوالے سے تین بڑے چیلنجز کا سامنا ہے۔ امریکی اخبار دی یروشلم پوسٹ کے تجزیے کے مطابق صدر ڈونلڈ ٹرمپ کی ایران پالیسی، کانگریس میں ڈیموکریٹس کا بڑھتا ہوا اثر و رسوخ اور 2028 کے صدارتی انتخابات واشنگٹن اور اسرائیل کے تعلقات کو نئی سمت دے سکتے ہیں۔

تجزیے کے مطابق ایران کے ساتھ جنگ ریپبلکن پارٹی کی انتخابی شکست کی ایک اہم وجہ بنی، جبکہ ایگزٹ پولز میں 62 فیصد ووٹرز نے جنگ کی مخالفت کی۔ ٹرمپ کے سامنے دو ممکنہ راستے ہیں، ایران کے ساتھ مذاکرات میں رعایتیں دے کر سفارتی معاہدہ کرنا یا محدود مگر طاقتور فوجی کارروائی کے ذریعے جنگ ختم کرکے امریکی فوجی مداخلت کم کرنا۔ دونوں صورتوں میں امریکی اور اسرائیلی مفادات کے درمیان اختلافات پیدا ہونے کا خدشہ ظاہر کیا گیا ہے۔

دی یروشلم پوسٹ کے مطابق کانگریس کے دونوں ایوانوں میں ڈیموکریٹس کا کنٹرول اسرائیلی پالیسی، غزہ جنگ اور اسرائیل کو امریکی فوجی امداد کے حوالے سے سماعتوں، تحقیقات اور قانون سازی کی راہ ہموار کرسکتا ہے۔ ڈیموکریٹک پارٹی میں اسرائیل پر تنقید اور فوجی امداد مشروط کرنے کے مطالبات بھی بڑھ رہے ہیں۔

تجزیے میں کہا گیا ہے کہ 2028 کے صدارتی انتخابات بھی اسرائیل کیلئے ایک اہم چیلنج بن سکتے ہیں۔ نیویارک کے میئر ظہران ممدانی اور مشی گن کے نومنتخب سینیٹر عبدل السید جیسے سیاستدانوں کی کامیابی ڈیموکریٹک امیدواروں کو اسرائیل پر سخت تنقیدی مؤقف اپنانے کی ترغیب دے سکتی ہے، جبکہ آئندہ صدارتی امیدوار کو بھی پارٹی کے بدلتے ہوئے رجحانات کے پیش نظر اسرائیل کے بارے میں زیادہ سخت مؤقف اختیار کرنے کا دباؤ ہوسکتا ہے۔