پیپلز پارٹی کا آزاد کشمیر کے صدر کے عہدے پر اپنا امیدوار لانے کا اعلان

آزاد کشمیر (صداۓ سچ نیوز) پیپلز پارٹی نے آزاد کشمیر کے صدر کے عہدے پر اپنا امیدوار لانے کا اعلان کردیا ہے۔

صدرمملکت آصف علی زرداری سے پیپلزپارٹی آزاد کشمیر کے رہنماؤں کی ملاقات ہوئی، جس میں آزاد کشمیر میں نئے صدر کے انتخاب پر مشاورت مکمل کرلی گئی۔

بعدازاں سردار تنویر الیاس نے میڈیا سے گفتگو کرتے ہوئے کہنا تھا کہ آزاد کشمیر حکومت کی کارکردگی پر بریفنگ دی گئی،تین ماہ کی حکومتی کارکردگی اور مالی امور پر صدر مملکت کو آگاہ کیا گیا۔

سابق صدر بیرسٹر سلطان محمود چوہدری کی وفات کو ریاست کا بڑا نقصان قرار دیا گیا،مسئلہ کشمیر کیلئے سلطان محمود کی عالمی سطح پر خدمات کو خراج عقیدت پیش کیا گیا۔

آزاد کشمیر میں نئے صدر کے انتخاب پر مشاورت مکمل ہوگئی،پیپلز پارٹی نے آزاد کشمیر کے صدر کے عہدے پر اپنا امیدوار لانے کا اعلان کیا ہے،عدد ی برتری اور آئینی تقاضوں کے تحت صدر پیپلز پارٹی کا ہونا چاہیے۔

چند روز میں آزاد کشمیر کے نئے صدر کا انتخاب کیا جائے گا،آئینی طریقہ کار کے تحت صدر کے انتخاب کا عمل مکمل ہو گا،ہائی کورٹ کے چیف جسٹس کو بھی ذمہ داری دی جا سکتی ہے ۔

انہوں نے مزید کہا کہ ڈپٹی اسپیکر آزاد کشمیر اسمبلی کی تبدیلی کا فیصلہ بھی کر لیا گیا ہے،نیا ڈپٹی اسپیکر پیپلز پارٹی سے لائے جانے کا امکان ہے،چیف الیکشن کمشنر کی تعیناتی کیلئے نام وفاق کو بھجوا دیے گئے، تقرری جلد متوقع ہے۔