یو اے ای ایران مخالف کارروائیوں میں براہِ راست ملوث تھا, ایرانی وزیر خارجہ

تہران (صداۓ سچ نیوز) ایرانی وزیر خارجہ عباس عراقچی نے متحدہ عرب امارات کو  ایران مخالف کارروائیوں میں براہِ راست ملوث قرار دیدیا۔

ایرانی وزیرخارجہ نے برکس سے خطاب کرتے ہوئےکہا کہ یکجہتی کی خاطر  متحدہ عرب امارات کا نام نہیں لیا، جب ایران پر حملے شروع ہوئے تو  متحدہ عرب امارات نے  مذمت تک نہیں کی، ایران سے متعلق متحدہ عرب امارات اپنی پالیسی پر نظرِثانی کرے۔

ایرانی وزیر خارجہ نے  کہا وقت آگیا ہےکہ امریکا کی غنڈہ گردی کو تاریخ کےکوڑے دان میں پھینک دیا جائے، امریکی غنڈہ گردی کے خلاف ہماری مزاحمت نئی جنگ نہیں، ہم میں سے اکثر  قومیں اسی جبر کا مختلف شکلوں میں سامنا کرتے رہے ہیں۔

عباس عراقچی بولے وقت آگیا ہے ہم مشترکہ طور پر  آگے بڑھیں، غنڈہ گردی کا یہ عمل تاریخ کے کوڑے دان میں ڈالے جانے کے قابل ہے، آج ہم پہلے سے کہیں زیادہ ایک دوسرے کے قریب ہیں اور ہم اس مشترکہ اور خطرناک چیلنج کو نظر انداز نہیں کر سکتے۔

انہوں نے کہا  زوال پذیر سلطنتیں اپنے انجام کو روکنے کے لیے کسی بھی حد تک جا سکتی ہیں۔

یاد رہےکہ گزشتہ روز اسرائیلی وزیر اعظم کے دفتر کی جانب سے جاری بیان میں کہا گیا تھا کہ اسرائیلی وزیر اعظم نیتن یاہو نے ایران جنگ کے دوران متحدہ عرب امارات کا خفیہ دورہ کیا اور اماراتی صدر سے ملاقات کی تاہم یو اے ای  نے ایران جنگ کے دوران اسرائیلی وزیراعظم کے دورہ امارات کی تر دید کر دی۔