عالمی معیشت نئے خطرات کی زد میں، مہنگائی اور بلند شرحِ سود برقرار رہنے کا خدشہ

انسٹیٹوٹ آف انٹرنیشنل فنانس (آئی آئی ایف) نے سرمائے سے متعلق اپنی نئی رپورٹ میں خبردار کیا ہے کہ عالمی معیشت ایک زیادہ محدود، غیر یقینی اور مشکل مرحلے میں داخل ہو رہی ہے۔

رپورٹ کے مطابق دنیا کو اس وقت تیل کی بڑھتی پیداواری لاگت، غیر یقینی سپلائی چینز اور سخت قرض شرائط جیسے بڑے چیلنجز کا سامنا ہے، جس کے باعث عالمی اقتصادی دباؤ میں اضافہ ہو رہا ہے۔

آئی آئی ایف کا کہنا ہے کہ مہنگائی کے خطرات کو قابو میں رکھنا مسلسل مشکل ثابت ہو رہا ہے، جبکہ توانائی کی قیمتوں میں نسبتاً استحکام کے باوجود جغرافیائی سیاسی کشیدگی کے اثرات اضافی لاگت برقرار رکھے ہوئے ہیں۔

رپورٹ میں کہا گیا ہے کہ عالمی سطح پر جاری سیاسی تنازعات اور جغرافیائی اثرات مہنگائی اور شرحِ سود کو مزید بلند رکھنے کے لیے دباؤ ڈال سکتے ہیں، جس سے ترقی پزیر معیشتوں کو زیادہ مشکلات پیش آ سکتی ہیں۔

یہ بھی پڑھیں: پاکستان میں سیلابی خطرات میں اضافہ، معیشت کو بڑے نقصانات کا خدشہ

آئی آئی ایف کے مطابق امریکا اس وقت یورپ کے مقابلے میں نسبتاً زیادہ محفوظ معیشت دکھائی دیتا ہے، تاہم امریکی معیشت بھی عالمی دباؤ سے مکمل طور پر محفوظ نہیں۔

رپورٹ میں یہ بھی کہا گیا ہے کہ یورپ کو درآمدی توانائی کی بلند قیمتوں اور صنعتی سرگرمیوں میں سست روی کا زیادہ براہِ راست سامنا ہے، جس کے باعث یورپی معیشت پر دباؤ بڑھ رہا ہے۔