ساؤتھ ایئر پاکستان میں علاقائی پروازوں کے آغاز کے لیے تیار

اسلام آباد (صدائے سچ نیوز) پاکستان کی نئی علاقائی ایئرلائن ساؤتھ ایئر نے بلوچستان، جنوبی پنجاب، اندرونِ سندھ اور دیگر دور دراز علاقوں کو قومی فضائی نیٹ ورک سے منسلک کرنے کے عزم کا اظہار کرتے ہوئے کہا ہے کہ ایئرلائن اپنی تمام آپریشنل، تکنیکی اور انتظامی تیاریاں مکمل کر چکی ہے اور پروازوں کے آغاز کے لیے تیار ہے۔

ساؤتھ ایئر کی چیف ایگزیکٹو آفیسر نشاط فاطمہ اور ترجمان ائیر وائس مارشل اعجاز محمود ملک نے پریس بریفنگ کے دوران بتایا کہ ملتان بیسڈ ایس او ایس گروپ کے زیر انتظام قائم کی جانے والی اس ایئرلائن کے دو جدید طیارے گزشتہ کئی ہفتوں سے کراچی ایئرپورٹ پر موجود ہیں، جبکہ مزید دو طیارے فرانس سے پاکستان آنے کے لیے تیار کھڑے ہیں اور سول ایوی ایشن اتھارٹی کی حتمی منظوری کے منتظر ہیں۔

انہوں نے کہا کہ کمپنی تمام قانونی تقاضے، تکنیکی شرائط اور ریگولیٹری معاملات مکمل کر چکی ہے جبکہ اس منصوبے پر کروڑوں روپے کی سرمایہ کاری بھی کی جا چکی ہے۔ تاہم منظوری میں تاخیر کے باعث کمپنی کو طیاروں کی پارکنگ فیس، لیز رینٹ، عملے کی تنخواہوں اور دیگر آپریشنل اخراجات کی مد میں مسلسل مالی نقصان برداشت کرنا پڑ رہا ہے۔

پریس بریفنگ میں بتایا گیا کہ ساؤتھ ایئر گوادر، تربت اور پنجگور جیسے اہم علاقوں کو ملک کے بڑے شہروں سے فضائی طور پر منسلک کرنے کے لیے تیار ہے، جبکہ سیہون شریف اور ڈیرہ اسماعیل خان کے لیے روزانہ پروازیں شروع کرنے کا منصوبہ بھی شامل ہے۔

ساؤتھ ایئر انتظامیہ کا کہنا تھا کہ نئی ایئرلائنز کا قیام کسی بھی ملک میں مسابقت، روزگار، سیاحت، تجارت اور عوامی سہولتوں میں اضافے کا باعث بنتا ہے، مگر پاکستان میں فضائی شعبہ اب بھی غیر ضروری بیوروکریسی، پالیسیوں کے عدم تسلسل اور ریگولیٹری تاخیر جیسے مسائل کا شکار ہے۔

انہوں نے سوال اٹھایا کہ اگر ایک نئی ایئرلائن تمام قانونی تقاضے پورے کرنے اور مکمل آپریشنل تیاری کے باوجود بروقت پروازیں شروع نہ کر سکے تو اس سے سرمایہ کاروں کو کیا پیغام جائے گا۔

پریس بریفنگ میں کہا گیا کہ بلوچستان کو قومی معاشی مستقبل اور سی پیک کا مرکز قرار دیا جاتا ہے، لیکن وہاں کے کئی اہم علاقے آج بھی مناسب فضائی سہولتوں سے محروم ہیں۔ ساؤتھ ایئر کے مطابق علاقائی فضائی رابطے صرف سفری سہولت نہیں بلکہ قومی ترقی، معاشی سرگرمی اور محروم علاقوں کو قومی دھارے میں شامل کرنے کا اہم ذریعہ ہیں۔

انتظامیہ نے مطالبہ کیا کہ سول ایوی ایشن اتھارٹی نئی نجی ایئرلائنز کے لیے شفاف، تیز رفتار اور سرمایہ کار دوست ریگولیٹری ماحول فراہم کرے تاکہ پاکستان کا فضائی شعبہ مزید مضبوط، مسابقتی اور عوام دوست بن سکے۔