غدیر دین اسلام کی تکمیل اور ہر مسلمان کے لئے مسرت کا دن ہے عیدِ غدیر کے موقع پر سادات حویلی گوجر خان میں ناشتے کا اہتمام

گوجرخان(صدائے سچ نیوز) عیدِ غدیر کے پرمسرت موقع پر ہر سال کی روایت کو برقرار رکھتے ہوئے سادات حویلی،نزد فوجی فاؤنڈیشن کالج و الحجراہ اسکول گوجر خان میں خصوصی ناشتے کا اہتمام کیا گیا۔

اس موقع پر میزبانوں سید شفاعت حسین شاہ، سید شبر عباس شاہ ایڈووکیٹ،سید شبیر عباس شاہ اور سید حبدار حیدر شاہ نے مہمانوں کا پرتپاک استقبال کیا اس موقع پر مختصر دعائیہ تقریب منعقد ہوئی۔

تقریب سے خطاب کرتے ہوئے سید شبر عباس ایڈووکیٹ نے عید غدیر پر روشنی ڈالتے ہوئے کہا کہ غدیر تکمیل دین کا دن ہے اس دن رسول اللہ نے اللہ تعالٰی کے حکم سے آخری حج کے موقع پر مولا علی علیہ السلام کی ولایت کا اعلان کیا۔

تقریب میں مختلف مکاتبِ فکر سے تعلق رکھنے والے افراد، معززینِ علاقہ، سماجی شخصیات اور شہریوں کی بڑی تعداد نے شرکت کی۔

شرکاء نے عیدِ غدیر کی اہمیت و فضیلت پر روشنی ڈالی اور باہمی بھائی چارے، اتحاد و یگانگت اور مذہبی ہم آہنگی کے فروغ پر زور دیا۔

شرکاء نے اس خوبصورت اور خوشگوار اجتماع کے انعقاد کو سراہتے ہوئے میزبانوں کی کاوشوں کو خراجِ تحسین پیش کیا۔تقریب خوشگوار ماحول میں اختتام پذیر ہوئی جہاں شرکاء نے ایک دوسرے کو عیدِ غدیر کی مبارکباد بھی دی۔